Ƙungiyar Triple R ta Kannywood ta kai ziyara ga fitaccen jarumin masana’antar, Malam Tanimu Akawu, a asibitin da aka kwantar da shi a Jos, Jihar Filato, domin duba lafiyar sa da yi masa fatan samun sauƙi.
Tawagar ta samu jagorancin shugaban tafiyar, mawaƙi Dauda Kahuta Rarara, inda suka yi wa jarumin addu’ar Allah ya ba shi lafiya, ya sauƙaƙa masa halin da yake ciki.
Tanimu Akawu dai ya daɗe yana fama da matsalolin lafiya da suka haɗa da hawan jini da ciwon suga.
Wata majiya ta shaida wa mujallar Fim cewa rashin lafiyar ya ƙara tsananta a wani lokaci da jarumin ke yawan bayyana ra’ayoyin sa a soshiyal midiya dangane da dalilan sa na goyon bayan sake zaɓen Shugaba Bola Ahmed Tinubu, lamarin da a wasu lokuta ke jawo ce-ce-ku-ce da muhawara tsakanin jama’a.
Ziyarar Triple R ta ƙara nuna irin ƙauna, kulawa da zumuncin da ke tsakanin ‘yan masana’antar Kannywood, musamman a lokacin da ɗaya daga cikin su ke fuskantar ƙalubale ko jarabawar rashin lafiya.
