IDAN Allah ya kai mu ranar Asabar, 6 ga Disamba, 2025 za a ɗaura auren ɗan fitaccen darakta a Kannywood, Alhaji Balarabe Murtala Baharu, wato Imamu Balarabe Murtala, da amaryar sa Rabi’atu Abubakar Abdulƙadir.
Za a ɗaura auren da misalin ƙarfe 10 na safe a gidan da ke kallon Masallacin Alhaji Abubakar Sheikh Hamza a unguwar Je-ka-da-Fari a garin Gombe, Jihar Gombe.
Malam Balarabe ya shafe tsawon lokaci yana ba da umurni a Kannywood. Ya ba da umurni a wani ɓangare na shirin ‘Daɗin Kowa,’ kuma shi ne mataimakin mai ba da umurni a shirin ‘Kwana Casa’in,’ a yanzu kuma shi ne daraktan sabon shirin ‘Zaɓi Biyu’ na tashar Arewa 24.
Allah ya sa a yi bikin lafiya a gama lafiya, ya ba da zaman lafiya da ƙaruwar arziki.
