FITACCEN mawaƙi a Kannywood, Ɗayyab Hassan, wanda aka fi sani da Maiɗa’a, ya ce idan da gaske Hukumar Kula Da Gidajen Rediyo da Talbijin ta Nijeriya (Nigerian Broadcasting Corporation, NBC) ta ke yi, to ta dakatar da saka waƙoƙin Ado Gwanja a soshiyal midiya.
Ɗayyab ya yi waɗannan kalamai ne a lokacin da ya ke zantawa da mujallar Fim, bayan hukumar ta ba da umarnin dakatar da saka waƙar ‘Warr’ a gidajen rediyo da talbijin.
Mawaƙin ya ce, “Da ya ke hankali ya koma kan Ado Gwanja, wallahi wannan sam ba adalci aka yi wa kafafen yaɗa labarai ba, sai ma rainin wayo da ake nuna wa mutanen Arewa.”
Ya ci gaba da cewa, “Wallahi mawaƙan Turanci sun fi mu rashin mutunci da waƙoƙin su marasa ɗa’a.
“Idan ka duba, za ka ga suna da yawa. A nawa fahimtar, kawai ana so a nuna wa duniya cewa mu mawaƙan Arewa ba mu da tarbiyya ne. Kuma wannan al’amari kaf mutanen arewacin ƙasar nan zai shafa.
“Ni ba na goyon bayan Ado Gwanja na ke yi ba sam, amma ina aka kai mawaƙan (kudancin) Nijeriya marasa tarbiyya masu nuna tsiraici da nuna baɗala?
“Waɗannan waƙoƙi ana ganin cewa kamar ba za su ɓata mana tarbiyyar yara masu tasowa kamar ƙanne, ‘ya’ya da sauran su ba? Ko ana ganin ba za a riƙa motsa masu sha’awa ba ne?”
Ɗayyab Maiɗa’a ya ce, “Idan ka na mawaƙin Arewa, ba ka da galihu; duk abin da ka yi komai, ƙanƙantar sa, idan ya samu karɓuwa shi kenan ka zama mai lalata tarbiyya.
“Abin da ake tunanin Gwanja ya yi akwai ƙuruciya a cikin sa, ko kuma in ce akwai jahilci, ba ina nufin jahili ba ne, a’a, duk abin da ba ka da ilimin sa kai jahilin sa ne, in fa bai sani ɗin ba kenan.
“Wannan waƙa ta ‘Warr’ ko da an hana saka ta a gidajen talbijin da gidajen rediyo, to fa ta zama gwal a sana’ance, domin yanzu a TikTok, Instagram, Facebook, WatsApp da sauran su ake kallo yayin da komai ƙanƙantar waya za ta biya wa kowa buƙatun sa kowane iri.
“Idan gwamnatin Nijeriya ta na so ta burge, to ta rufe kafafen sada zumuntan na zamani, shi ne mafita, kuma shi ne zaman lafiya a kan dukkan makircin masu yaɗa farfaganda da sauran abin da ke kawo mana matsalolin rayuwa.”
