FINAFINAI 510 ne suka samu shiga Gasar Baje-kolin Finafinai ta KILAF Awards ta bana.
Wannan ita ce gasa karo na bakwai da za a gudanar tun farkon fara taron a shekarar 2018.
Daraktan shirya taron KILAF Awards, Malam Muhammad Galadima, shi ne ya ba da sanarwar hakan a tattaunawar sa da mujallar Fim kan shirye-shiryen bikin na bana.
Galadima ya ce, “A bana sai dai mu ƙara godiya ga Allah a game da wannan gasar saboda ka ga wannan shi ne karo na bakwai da za a yi.
“Kuma a shekarar da ta gabata mun samu finafinai guda 50 daga ƙasashe 21 da suka shiga gasar, amma a bana wani abin mamaki a wannan shekarar kafin mu kai ga rufe karɓar finafinan a ƙarshen watan Agustan da ya gabata, mun samu finafinai da suka shiga gasar har guda 510 daga ƙasashe 54.
“Don haka wannan abin alfahari ne ga wannan gasar da kullum abin yake ƙara haɓaka.
“Kuma wani abu da zai ƙara ba ka mamaki a bana shi ne hukumar gudanarwa ta Jami’ar Bayero ya bayar da dama ga duk wani ɗalibi da ya shirya fim da ya dace ya ajiye kuɗi dubu ɗari biyar za a bayar ga duk ɗalibin da ya shirya fim da ya dace a gasar a duk inda yake a duniya.
“To, ga wannan wani abu ne da ba a saba yi ba.
“Don haka a yanzu tsare-tsaren wannan biki ya yi nisa, za a bayar da dama masu ɗaukar nauyi su shigo sosai da sosai.
“Kuma a wannan shekarar kusan za a gabatar da kashi saba’in ba abubuwan da za a gudanar a cikin Jami’ar Bayero.
“Kamar kowace shekara akwai yawon buɗe ido ga baƙi da za su zo. Sai cin abinci da sarakuna kamar yadda aka saba yi a otal ɗin Tahir, da sauran abubuwa, yayin da kuma a wannan shekarar muna sa ran za a yi bikin ba da kyaututtuka a babban ɗakin taro na Gidan Gwamnatin Kano domin a samu damar shigowa a tsakanin gwamnati da mutane.
“To kuma abin da zai ba ka sha’awa game da wannan taron shi ne yana taimaka wa tattalin arzikin Jihar Kano, saboda idan baƙi suka shigo, dole sai sun sayi abubuwan da ake sayarwa a Kano da hawa mota, wanda hakan zai taimaka wa cigaban tattalin arzikin Jihar Kano da kuma samun kuɗin shigar ta.
“Don haka ya kamata a ce wannan abin wani abu ne ba wai Kannywood kawai ba, kamata ya yi a ce duk wani wanda yake kishin Hausa da Hausawa ya bayar da gudunmawa a duk inda yake a duniya, saboda magana ake ta assasa harsunan Afirika.
“To duk wanda ya yi fim a Afrika, ko da wanne yare ya yi shi, in dai na Afrika ne, ko da a wata ƙasa yake a cikin Turai, in dai fim ɗin da yaren Afrika ya yi, to KILAF ta na yi masa maraba.
“Don haka a yanzu mun tura finafinan ga alƙalan gasar, suna can suna aiki ba dare ba rana don ganin an samu sakamako mai kyau.
“A shekarar da ta gabata fim ɗin Zimbabwe shi ne ya kwashe kyaututtuka masu tsoka, to a bana mun zuba ido mu ga fim ɗin wace ƙasa ne zai samu nasara.
“Muna fatan za mu yi taron lafiya mu tashi lafiya cikin nasara.”
