Gwamnatin Jihar Kano ta ta dakatar da jarumin Kannywood Abdul Sahir (Malam Ali na ‘Kwana Casa’in’) daga yin fim har tsawon shekaru biyu.
Shugaban Hukumar Tace Finafinai ta jihar, Alhaji Abba El-Mustapha, shi ne ya bayyana haka a yau Litinin tare da bayyana cewa sun ɗauki wannan matakin ne saboda wani bidiyo da ɗan wasan ya wallafa, kuma aka buƙace shi ya kai kan sa zuwa hukumar amma ya ƙi zuwa.
Hukumar ta yi kira ga duk wani darakta da ya san ya yi fim tare da shi da ya gaggauta kai wa hukumar fim ɗin domin a tantance shi, don gudun kada ya yi asara.
A ‘yan kwanakin nan ne dai aka ga jarumin ya saka wani bidiyo a TikTok ɗauke da wasu kalamai da wasu su ka ce ba su dace da tarbiyya ba.
Hakan ya sa hukumar ta ta gayyace shi domin tattaunawa da shi a kai, shi kuma ya ƙi zuwa.
