HAR kullum jama’ar gari masu bibiyar ‘yan fim ba su iya gane wasu abubuwa da aka saba yi a masana’antar Kannywood. Yau kusan shekara uku zuwa huɗu da ake ɗaukar hotunan kafin aure (prewedding pictures) na ‘yan fim idan akwai buƙatar a yi amfani da su a wani fim ko kuma irin shagalin da Ibrahim Sharukhan ya ke haɗawa don tallar ayyukan sa na mai gabatar da biki (MC) da kuma tallata wurin taron sa (event centre). Kuma da ma shi ne wanda ya fara yin irin waɗannan hotunan a Kannywood.
A kwana-kwanan nan, mujallar Fim ta ba da labari a kan hotunan mawaƙi Ado Gwanja da jaruma Momee Gombe, waɗanda aka yi ta yaɗa cewa za su yi aure. Daga ƙarshe mujallar ta tuntuɓi Gwanja, inda ya shaida mata cewa a fim ne.
A baya mun yi ire-iren waɗannan labaran a kan jaruman da aka ga sun yi irin waɗannan hotuna. Mun ba da labarin na Sadiq Zazzaɓi da Maryam Booth, Ali Nuhu da wata waddda ba ma ‘yar fim ba ce, wanda a lokacin an fi gaskata nasu domin ba a san fuskar ta ba.
A cikin kwanakin nan kuma, an fara yawo da irin waɗannan hotuna da ake yi na kafin aure na jarumi Umar Gombe da jaruma Hauwa Ayawa (Azima ‘Gidan Badamasi’).
Yanayin yadda su ka ɗauki nasu hotunan ba kamar na sauran ba ne, domin duk wanda ya ga hotunan zai ɗauka auren za su yi.
Da farko ban so yin wannan rubutun ba, saboda a tunani na zuwa yanzu mutane sun gane yadda abin ya ke, tunda an sha yi, ba sau ɗaya ba, ba biyu, ba uku ba.
Sai dai kuma yawan kiran waya da na ke samu ana tambaya ta gaskiyar lamari a kan hotunan, ya sa na yi rubutun domin mutane su tabbatar da cewa hotunan ba na auren gaske ba ne. Har ta kai ga wani darakta da abokin sa, wanda shi mawaƙi ne, su ka yi takakkiya su ka same ni don jin gaskiyar abin da ke faruwa.
Su dai waɗannan hotuna, an ɗauke su ne domin shirin ‘Gidan Badamasi’ da ake nunawa a tashar Arewa 24, wanda a ranar Alhamis, 6 ga Oktoba, 2022 za su fara nuna sabon shirin. Ko shi daraktan shirin, Falalu A. Ɗorayi, da ya wallafa hotunan, cewa ya yi, “Allah ya sanya alkhairi Umar Gombe & Hauwa Ayawa, komai lokaci ne,” sai kuma ya rubuta: “6 October, 2022,” wadda ita ce ranar da za su fara nuna sabon shirin. Wannan ita ce gaskiyar lamari a kan hotunan.
