Jarumin finafinan Bollywood, Dharmendra, ya rasu a birnin Mumbai na Indiya yana da shekaru 89.
Firayim Ministan Indiya, Narendra Modi, ya yi jimamin rasuwar sa, yana cewa mutuwarsa “ta kawo ƙarshen wani zamani a sinimar Indiya”.
Dharmendra, wanda sau da dama yake bayyana kan sa a matsayin “mutum mai sauƙi”, ya samu ƙauna da amincewa ta musamman daga miliyoyin masoyan sa.
Mafi shahara a matsayin Veeru, ƙaramin ɗan fashi mai annashuwa a fim ɗin Sholay na 1975, ya fito a finafinai sama da 300 – da dama daga cikin fsu sun yi fice, suka kuma ƙayatar da masu kallo a tsawon shekaru.
Waƙoƙin da ya fito a cikin su sun yi fice a jerin waƙoƙi, kuma soyayyar sa da auren da ya yi da Hema Malini sun jawo hankula sosai.
Ana kiran sa da “asalin He-Man na Bollywood” da kuma “Garam (mai zafi) Dharam”, kuma a zamanin sa sau da yawa ana sanya shi cikin jerin “maza masu kyan gani” a duniya. Har ma wasu mata masoyan sa suna kwana da hotunan sa a ƙarƙashin matashin kai.
Shahararrun ‘yan fim ma ba su tsira daga kyan jikin sa ba – shekaru da dama, jaruma Madhuri Dixit ta bayyana shi a matsayin “ɗaya daga cikin mutanen da suka fi kyau da na gani a allo”, tauraron fim Salman Khan ya ce Dharmendra shi ne “mijin da ya fi kyau”, kuma jaruma Jaya Bachchan ta kira shi “Allahntakar Helenawa”.
Dharmendra kullum yana cewa yana jin “kunya” idan aka yi maganar kyawun sa, yana danganta hakan ga “halitta, iyaye na da gado”.
An haife shi a ranar 8 ga Disamba 1935 a wani ƙauye a gundumar Ludhiana ta Punjab, cikin iyalin Jatt-Sikh masu matsakaicin matsayi, kuma mahaifinsa malamin makaranta ya saka masa suna Dharam Singh Deol.
A wata hira da ya yi da BBC Hindi a 2018, ya ce mahaifin sa yana son ya yi karatu, amma shi tun farko ya kamu da son finafinai kuma ya nufi zama jarumi.
“Na kalli fim na farko ina aji tara, kuma ya ɗauke min hankali. Na rika mamaki, ina ne wannan aljanna da waɗannan kyawawan mutane ke rayuwa? Na ce dole ne in sami hanyar zuwa can. Na ji kamar nawa ne, kuma ina cikin su.”
Amma lokacin da ya faɗa wa iyalin sa, sai suka firgita.
————–
Shahararren jarumin Bollywood, Dharmendra, ya rasu a gidan sa da ke Mumbai a yau Litinin yana da shekaru 89.
An ga motar asibiti, ‘yan’uwa da fitattun mutane suna isa gidan don girmama shi na ƙarshe. Daraktan finafinai Karan Johar ma ya wallafa rubutu mai cike da damuwa a Instagram, yana alhini kan rasuwar wannan ƙwararren jarumi.
Jarumin mai shekaru 89, wanda aka san shi da farin jini, salo da fitattun ayyuka na tsawon shekaru da dama, an sallame shi daga Asibitin Breach Candy da ke Mumbai a ranar 12 ga Nuwamba, kuma aka ce yana cikin ƙoshin lafiya yana murmurewa a gida. Dharmendra zai cika shekara 90 a ranar 8 ga Disamba.
A wancan lokacin, Likita Rajiv Sharma daga asibitin ya shaida wa IANS cewa shahararren jarumin ya koma gida “cike da gamsuwa” bayan samun kula.
Yayin bada rahoto kan halin da yake ciki, ya ce: “Maigida Dharmendra ya bar asibiti cikin gamsuwa. Iyalan sa sun ɗauke shi zuwa gida. An tanadi komai domin kula da shi.”
Ya ƙara da cewa: “Yana cikin yanayi mai kyau. Ina roƙon jama’a kada su watsa labaran ƙarya, sai dai su yi masa addu’ar samun sauƙi domin ya samu yin murnar zagayowar ranar haihuwar sa mai zuwa cikin alfahari.”
Dharmendra ya shiga mawuyacin hali kuma ana sa ido sosai a kansa
An kwantar da jarumin a Asibitin Breach Candy a baya, kuma rahoton IANS na 10 ga Nuwamba ya ce yana cikin mawuyacin hali kuma an sanya shi a kan na’urar taimakon rai.
A ranar 31 ga Oktoba, majiyoyi sun shaida wa IANS cewa ana duba lafiyar sa sosai ƙarƙashin kulawar manyan likitoci a asibitin.
Ayyukan finafinai da yake shirin fitowa a cikin su
A ɓangaren aiki, Dharmendra ya fito a fim ɗin sa na ƙarshe a 2024 mai suna ‘Teri Baaton Mein Aisa Uljha Jiya’, tare da Shahid Kapoor da Kriti Sanon.
Har ila yau, ya shirya fitowa a fim ɗin Ikkis wanda Sriram Raghavan ya bada umarni. Fim ɗin ya ƙunshi Agastya Nanda da Simar Bhatia, kuma labari ne na yaƙi da ya dogara da rayuwar Arun Khetarpal, wanda ya fi kowa ƙanƙanta cikin masu samun lambar girmamawar Param Vir Chakra.
Fim ɗin ya ƙunshi Jaideep Ahlawat da Sikandar Kher, kuma an shirya sakin sa a watan Disamba.
Sana’ar jarumta mai tarihi ta tsawon shekaru shida
Ana ɗaukar Dharmendra a matsayin ɗaya daga cikin fitattun taurari mafi nasara a tarihin sinimar Indiya. Ayyukan sa sun wuce shekaru 60, ya kuma yi finafinai sama da 300. Har ma yana da tarihin fitowa a mafi yawan manyan finafinai masu nasara a sinimar Hindi. A 2012 aka karrama shi da lambar yabo ta Padma Bhushan.
Farkon nasara da hawan sa zuwa matakin tauraro
Dharmendra ya fara fitowa a fim a 1960 da ‘Dil Bhi Tera Hum Bhi Tere’. Ya fara samun karɓuwa sosai a tsakiyar shekarun 1960 da finafinai irin su ‘Ayee Milan Ki Bela’, ‘Phool Aur Patthar’ da ‘Aaye Din Bahar Ke.’
Daga ƙarshen 1960s zuwa 1980s, ya fito a jerin manyan finafinai ciki har da Ankhen, Shikar, Aya Sawan Jhoom Ke, Jeevan Mrityu, Mera Gaon Mera Desh, Seeta Aur Geeta, Raja Jani, Jugnu, Yaadon Ki Baaraat, Dost, Sholay, Pratiggya, Charas, Dharam Veer, Chacha Bhatija, Ghulami, Hukumat, Aag Hi Aag, Elaan-E-Jung, Tahalka, Anpadh, Bandini, Haqeeqat, Anupama, Mamta, Majhli Didi, Satyakam, Naya Zamana, Samadhi, Resham Ki Dori, Chupke Chupke, Dillagi, The Burning Train, Ghazab, Do Dishayen da Hathyar.
Fitattun rol a shekarun baya
A ƙarshen 1990s da bayan haka, ya fito a finafinai da dama a matsayin jarumin halayya, ciki har da Pyaar Kiya To Darna Kya, Life in a… Metro, Apne, Johnny Gaddaar, Yamla Pagla Deewana, Rocky Aur Rani Kii Prem Kahaani da Teri Baaton Mein Aisa Uljha Jiya.
