ALLAHU Akbar! Allah ya ɗauki ran tsohon shugaban Ƙungiyar ‘Yan Wasan Kannywood ta Jihar Kaduna, Malam Muhammad Auwal Aliyu, wanda aka fi sani da Auwal Bauchin-Bauchi.
Allah ya ɗauki ran Auwal ne a ranar Talata, 12 ga Disamba, 2023 da misalin ƙarfe 4:00 na yamma a wani asibitin kuɗi da ke hanyar Jos a garin Bauchi.
Marigayin, mai kimanin shekaru 54 a duniya, ya kai tsawon shekara bakwai ya na jinya tun a Kaduna, daga baya ya koma gida.
An yi jana’izar sa da misalin ƙarfe 6:00 na yamma a masallacin Ajiyan Bauchi da ke unguwar Makwalla, Bauchi.
Allah ya jiƙan shi da rahama.
