A DAREN yau a birnin Kano aka shiga ranar farko ta Biki Da Baje-kolin Finafinan Harsunan Gadon Afirka na Kano, wato ‘Kano Indigenous Languages of Africa Film Market and Festival’ (KILAF Awards 2023), tare da yin dinar maraba da baƙin da su ka zo daga ciki da wajen Nijeriya.
An gudanar da liyafar a otal ɗin Bristol da ke unguwar Farm Centre.
An fara liyafar da misalin ƙarfe 7 na dare da jawabin maraba daga shugaban gudanar da taron, Malam Abdulkareem Mohammed.
Cikin jawabin nasa, ya yi godiya ga Allah da ya bayar da dama aka ci gaba da gudanar da wannan taron wanda a yanzu shi ne karo na shida wanda cikin ikon Allah ba a samu giɓi ba, kuma kullum sai ƙara samun nasara ake yi.
Ya ƙara da cewa, “Da man dai manufar samar da wannan dandamali na baje-kolin finafinan Afrika shi ne bunƙasa al’adu da kuma raya harshen uwa na Afrika wanda akan ya bayar da damar samar da wasu ɓangarori na gudanar da taron da su ka haɗa da gasar finafinai, cin abincin gargajiya, da kuma koyar da ilimin sana’ar fim a matakai da dama da su ka shafi sana’ar. Kuma a wannan shekarar ma an samar da tsare-tsare masu inganci domin ƙara fadada taron.
“Don haka ina yi wa manyan baƙin mu da su ka zo daga ciki da wajen ƙasar nan maraba, kuma mu na fatan za a yi taro lafiya a tashi lafiya.”
An gabatar da manyan baƙi, sannan aka yi shiru tare da yin addu’a ta tsawon minti biyu domin nuna alhini ga rasuwar darakta Aminu S. Bono wanda Allah ya yi wa rasuwa a jiya Litinin.
Daga nan aka ci abinci aka sallami jama’a.
