ƘUNGIYAR Dattawan Kannywood (Kannywood Foundation) ta bayyana alhini kan rasuwar ɗan fim din nan da ya rasu kwanan nan, wato Malam Aminu Muhammad, wanda ake yi wa laƙabi da Mai Chemist ko AZ.
A saƙon ta’aziyya da ya wallafa a soshiyal midiya, kakakin ƙungiyar, Alhaji Muhammad Kabir Maikaba, ya bayyana cewa rasuwar abokin aikin nasu da “gagarumin rashi”.
Maikaba ya ce, “Da sahalewar shugabancin majalisar ƙoli ta dattawan masana’antar shirya finafinan Hausa ta Kannywood, wato Kannywood Foundation, mu ke ba da sanarwa da taya duk ‘yan’uwa da abokan arziƙi da dukkannin ‘yan wannan masana’anta ta Kannywood alhinin rasuwar ɗaya daga cikin mashahuran jarumai na wannan masana’anta, wato Dakta Aminu Mai Chemist, wanda aka fi sani da Kawu Mala.”
Ya ci gaba da cewa, “Wannan majalisa mai albarka na jajanta wa wannan masana’anta bisa wannan gagarumin rashi da ta yi.
“Mu na yi wa Malam Aminu addu’ar Allah subhanahu wa ta’ala ya jiƙan shi, ya gafarta masa dukkan kurakuran sa.
“Mu na roƙon Allah ya faɗaɗa, kuma ya haskaka makwancin sa.
“Yadda Aminu ke da tausayi wajen gudanar da ayyukan sa, ya Allah ka dubi bayan sa, ya Allah ka tausaya wa abin da ya bari, kuma ka yi masu albarka. Allahu akbar!”
Idan kun tuna, mujallar Fim ta ba da labarin rasuwar Malam Aminu wanda ya koma ga Mahalicci a ranar Litinin, 8 ga Mayu, 2023 a asibitin Nassarawa da ke cikin birnin Kano.
Marigayin jarumi ne a cikin shirin ‘Daɗin Kowa’ na tashar Arewa 24, inda ya riƙa fitowa da sunan Kawu Mala.
Ya rasu sanadiyyar matsalar ciwon zuciyar sa da ya tashi, kamar yadda matar sa da babban ɗan sa su ka bayyana.
Ya rasu ya bar mata ɗaya, Hajiya Amina Yusuf (Umma), da ‘ya’ya 11, maza takwas da mata uku.
Mutuwar tasa ta girgiza mutane a ciki da wajen Kannywood saboda farin jinin sa.
