ALLAH ya albarkaci tsohuwar jarumar Kannywood, Maryam Musa Waziri, da samun ƙaruwar ɗa namiji bayan shekara ɗaya da wata biyu da auren ta.
Maryam Waziri, Laila a cikin shirin nan mai dogon zango na ‘Labari Na’, ta haihu ne a ranar Lahadi, 29 ga Janairu, 2023, a wani asibitin kuɗi da ke Kaduna.
An yi raɗin suna a shekaranjiya Lahadi, inda aka raɗa wa jaririn suna Muhammad, amma za a riƙa kiran sa da Fadeel.
Idan kun tuna, an ɗaura auren Maryam da tsohon fitaccen ɗan wasan ƙwallon ƙafar Nijeriya na ƙungiyar ‘Green Eagle’ ɗin nan, Tijjani Babangida, a ranar Juma’a, 26 ga Nuwamba, 2021.
Allah ya raya Muhammad (Fadeel), ya kuma albarkaci rayuwar sa, amin.
