A SAFIYAR yau Laraba, 6 ga Nuwamba, 2024 aka yi jana’izar darakta a Kannywood, Malam Kabiru Shehu (Kokobi).
An yi jana’izar ne da misalin ƙarfe 9:00 na safe, a ƙofar gidan sa da ke kan Titin Musawa daura da kan Titin Zango, Tudun Wada, Kaduna.
Daga nan aka kai shi gidan sa na gaskiya da ke maƙabartar kan Titin Ɓachama, Tudun Wada, Kaduna.
Marigayi Kokobi, ya rasu ne a jiya Talata, 5 ga Nuwamba, a wani asibitin kuɗi mai suna Amrullah, bayan fama da rashin lafiya na hawan jini.
Daraktan mai kimanin shekara 53 a duniya, ya rasu ya bar mata ɗaya da ‘ya’ya uku.
Mujallar Fim ta ruwaito cewa, ‘yan fim, musamman na Kaduna sun kaɗu matuƙa da wannan babban rashi.
Marigayin ya samu yabo daga wurin maƙwabtan sa da kuma abokan sana’ar sa.
Da ya ke Kokobi jami’in tsaro ne a hukumar “Kaduna State Vigilance Service” (KADVS), shugaban su da sauran abokan aikin sa duk sun halarci jana’izar sa.
Wasu daga cikin ‘yan fim da su ka halarci jana’iza da ta’aziyya sun haɗa da Sagir Baban Kausar, Hajiya Fatima Lamaj, Sabi’u Gidaje, Murtala Aniyar, Dikko Yakubu, Sulaiman Sir Zeesu, Nura MC, Sulaiman Sha’ani, Haruna Gidaje Muhammad Showman 22 da sauran su.
Allah ya jiƙan Kabiru Kokobi da rahama, Allah ya albarkaci dukkan abin da ya bari.
