HAƊAƊƊIYAR Ƙungiyar Masu Shirya Finafinai ta Nijeriya (MOPPAN) ta na gayyatar dukkan ‘yan Kannywood da ke faɗin ƙasar nan zuwa wurin taron da za ta gudanar tare da haɗin gwiwar Hukumar Yaƙi da Sha da Fataucin Miyagun Ƙwayoyi, wato NDLEA.
Za a yi taron a babban ɗakin taro na Kannywood TV da ke Kano a jibi Laraba, 1 ga Satumba, 2021 da misalin karfe 1:30 na rana.
Wannan sanarwar gayyatar ta fito ne ta hannun jami’in hulɗa da jama’a na ƙasa na ƙungiyar, Al-Amin Ciroma.
Kamar yadda ya rubuta a cikin sanarwar, Ciroma ya ce, “Bayan zaman tattaunawa, sakamakon takarda da MOPPAN ta rubuta wa Hukumar Yaki da Sha da kuma Yaki da Fataucin Ƙwayoyi, wato NDLEA, Haɗaɗɗiyar ƙungiyar masu shirya finafinai Nijeriya, MOPPAN na sanar da ‘ya’yan ta cewar ta samu damar haɗin gwiwa da hukumar, domin bayar da nata gudunmawa wajen yaƙi da shan ƙwayoyi.”
Ya ƙara da cewa, “Biyo bayan wannan haɗakar, shugaban MOPPAN na ƙasa, Dakta Ahmad Muhammad Sarari, na sanar da masana’antar Kannywood cewa shugaban hukumar NDLEA na ƙasa, Birgediya-Janar Mohammed Buba Marwa (ritaya), zai kawo wa ƙungiyar MOPPAN da Kannywood ziyara ta musamman.”
MOPPAN za ta karɓi baƙuncin shugaban da tawagar sa a babban ɗakin taro na Kannywood TV da ke Kano a ranar Laraba, 01 ga Satumba, 2021 da misalin ƙarfe 1:30 na rana.
“Kan haka ne MOPPAN ke gayyatar dukkannin masu ruwa da tsaki a wannan masana’anta da su halarci wannan taro mai muhimmanci.
“Taron dai zai samar da sahihiyar hanyar samar da kyakkyawar hanyar gudanar da ingantaccen tsari tsakanin hukumar da MOPPAN.”
Masha Allah kai mu lokaci, yasa wan nan taro albarka yasa wan uwa a amfana da taron, taron zai iya bada gagarumin gudumawa, saboda babban matsalar alumman arewa ne harkar miyagun kwayoyin nan.