‘YAN sanda a garin Santa Fe na jihar New Mexico ta ƙasar Amurka su na gudanar da bincike kan yadda wani jarumi ya bindige wata ma’aikaciyar shirya finafinai da darakta a wajen ɗaukar wani fim.
Wani rahoto da mujallar Fim ta fassaro daga jaridar New York Times ya bayyana cewa haɗarin ya faru ne a wani yanki mai yawan gonakin auduga da tsaunuka inda a kan shirya finafinan gumurzu (Westerns) tun cikin shekarun 1950s.
Jarumi Alec Baldwin su na ɗaukar wani fim a wani gidan gona a yammacin ranar Alhamis da ta gabata inda ya ke taka rol ɗin mugu, sai ya buƙaci yin amfani da bindiga a cikin wasan.
Sai wani mai tallafa wa darakta ya ɗauko ɗaya daga cikin bindigogi uku waɗanda mai kula da makamai a lokeshin ɗin ya jera kan wata amalanke, ya miƙa wa Baldwin, tare da faɗa masa cewa babu ɗuri a bindigar.
Ɗan sanda mai binciken lamarin, Joel Cano, ya bayyana cewa an faɗa wa jarumin cewa lallai babu albarushi a cikin bindigar.
Sa’ilin da Baldwin ya harba bindigar, inji jami’an ‘yan sanda, sai kawai aka ji ta tashi, kuma nan take ta kashe wata ma’aikaciyar shirin fim ɗin (cinematographer) tare da ji wa daraktan fim ɗin rauni.
Al’amarin ya tada muhawara kan dacewar aje bindigogi masu ɗuri a lokeshin ɗin shirya finafinai.
An bayyana cewa mai tallafa wa daraktan “bai san cewa bindigar na da ɗuri ba” lokacin da ya miƙa ta ga jarumi Baldwin.
Takardar ƙarar da ‘yan sanda su ka rubuta kan binciken farko kan al’amarin ba ta faɗi irin albarushin da ke cikin bindigar ba.
Da ya harba, sai ya samu daraktar tsarin hoto ta shirin (director of photography) a ƙirji, wato Halyna Hutchins, ‘yar shekara 42. An garzaya da ita asibitin Jami’ar New Mexico da ke garin Albuquerque, inda ta ce ga garin ku. Shi kuma daraktan shirin, Joel Souza, ɗan shekara 48, albarushin ya same shi a kafaɗa ne, ya ji masa ciwo; aka kai shi Cibiyar Magani ta Christus St. Vincent da ke Santa Fe, inda daga baya aka sallame shi.
A cikin wata sanarwa da ya wallafa a Tuwita a ranar Juma’a, Baldwin, ɗan shekara 63, ya ce, “Babu kalmomin da zan iya amfani da su in bayyana tsananin kaɗuwa ta da baƙin ciki na dangane da wannan haɗari abin baƙin ciki da ya ɗauki ran Halyna Hutchins, macen aure, uwa kuma abokiyar aikin mu wadda mu ke ƙauna.
“Ina bada cikakken haɗin kai ga binciken da ‘yan sanda ke yi don warware zare da abawar yadda wannan abin takaici ya auku, kuma ina magana da mijin ta, ina ba shi goyon baya shi da iyalin shi. Zuciya ta na tausaya wa mijin ta da ɗan su da kuma dukkan waɗanda su ka san Halyna tare da ƙaunar ta.”
Labarin fim ɗin ‘Rust’ wanda su Baldwin ke shiryawa ya shafi yadda aka yi kisa bisa haɗari ne da abin da ya biyo bayan kisan.
Sai ga shi lokeshin ɗin fim ɗin a gonar Bonanza Creek Ranch da ke yankin Santa Fe County — ya zama wurin kisa na gaske, da kuma binciken gaske.
Jami’in yaɗa labarai na ofishin ‘yan sandan garin, Juan Rios, ya faɗa ran Juma’a da yamma cewa ana ci gaba da bincike mai zurfi kuma masu bincike sun shiga lokeshin ɗin shirin a ranar tare da ci gaba da tattaunawa da waɗanda abin ya faru a kan idon su.
