DA yammacin shekaranjiya, Alhamis, 6 ga Nuwamba, 2025, tsohuwar jaruma a Kannywood, Hajiya Fati Ladan ta shiryawa ƙaramar ‘yar ta Raliya (Ihsan) bikin murnar zagayowar ranar haihuwar ta, inda ta cika shekara ɗaya a duniya.
An gudanar da bikin ne a farfajiyar gidan su da ke Yerima Close, kan Titin Jinya, daura da Titin Kanta, Kaduna.
Bikin, wanda aka fara da misalin ƙarfe 5:00 na yamma, ya samu halartar ƙawayen Fati da kuma matan abokan mijin ta, Alhaji Yerima Shettima da ‘ya’yan su.
Da ya ke bikin na yara ne, mai gabatarwa, wato kakakin magana (MC), Ibrahim Alhassan ya gabatar da gasar rawa a tsakanin yaran. Inda za a kira namiji ɗaya, mace ɗaya a saka masu waƙa su yi rawa, wanda ya fi iya wa, shi ne wanda lashe gasar. Sai dai fa, mata sun ba maraɗa kunya, domin su ne suka lashe gasar da kusan kaso 95, ciki har da babbar ‘yar Fati, Humaira.
Bayan nan, sai kuma aka shiga fagen goge wuya, cin maƙulashe, inda kowa ya ci gasasshen naman rago da sauran abubuwan sha.
Daga nan kuma sai aka yanka kek tare da yin hotuna Ihsan da mahaifiyar, yara da kuma iyayen su.
Bayan kammala hotunan ne, sai Fati Ladan ta yi jawabin godiya ga dukkan mahalarta taron. Inda ta ce, “Ina godiya matuƙa da irin ƙaunar da ku ke nuna min. A duk lokacin da zan yi abu, ku na ƙoƙarin halarta. Na gode sosai. Allah ya maida kowa gidan sa lafiya.
Iyayen yara da yara sun nuna farin cikin su da wannan bikin, domin sun cashe sosai.
Mujallar Fim ta ruwaito cewa, an haifi Raliya a ranar Talata, 5 ga Nuwamba, 2024, a asibitin sojojin sama (Air Force Base), Mando, Kaduna.
Allah ya raya Raliya, ya kuma albarkaci rayuwar ta.
