A YAU Lahadi, 26 ga Maris, 2023 ƙungiyar 15 Artist Network, ƙarƙashin mawaƙi Ibrahim Ajilo Ɗanguzuri, ta raba wa shugabannin ƙungiyar da membobin ta ruwan gora (bottled water) da biredi na azumi.
Rabon kayan, wanda aka yi a situdiyon mawaƙi S. Buma da ke Amal Complex, Kaduna, ya samu halartar shugabanni da membobin ƙungiyar, har da waɗanda ba ‘yan ƙungiyar ba.
Tun da farko sai da shugaban ƙungiyar, Ibrahim Ɗanguzuri, ya yi jawabin maraba ga dukkan mahalarta taron, sannan kuma ya ba da haƙuri game da rabon da za a yi. Ya ce, “Ina mai ba da haƙuri, wannan rabon da za mu yi ba mun yi shi ba ne ko don kun gaza ba ne, wannan ɗan ihsani ne na azumi. Allah ya karɓa mana ibadun mu.”
Daga nan sai aka ba da dama ga kowa idan da mai abin cewa. An yi zantuttuka masu ma’ana da kuma shawarwari. Sannan kuma an ba da damar kowa ya tashi ya gabatar da kan sa.
Bayan nan sai aka kira kowa ɗaya bayan ɗaya, ana ba shi katan ɗin ruwa da ledar biredi. Kowa ya karɓa cikin farin ciki da annashuwa.
An tashi da misalin ƙarfe 12:30.
Wasu daga cikin waɗanda su ka halarci taron sun haɗa Auwal Adamu (Hannun Dama), El-Bash Muhammad, Ibrahim Saminaka, Zayyanu Extra, Usman Aphala, Abdullahi Abu Uku, Adamu Musa Yabo, Ɗanjummai Ceevee, Ibrahim Lankasta da Raliya Muhammad.
