FITACCIYAR jarumar Kannywood, Hadiza Kabara, wadda aka fi sani da Lantana a cikin shirin ‘Daɗin Kowa,’ ko kuma Hauwa Adahama a cikin shirin ‘Gidan Badamasi,’ ta bi sahun manyan jaruman masana’antar da suka mallaki gidaje na alfarma.
Bayan shafe lokaci mai tsawo tana gudanar da aikin ginin gidan, jarumar ta samu nasarar kammala shi tare da ƙawata shi da kayayyakin zamani da na alatu domin samun ingantacciyar rayuwa.
A ranar Lahadi, 7 ga Yuni, 2026, ne aka gudanar da taron tarewar a sabon gidan nata da ke unguwar Fanshekara a Ƙaramar Hukumar Kumbotso ta Jihar Kano.
Taron ya gudana cikin annashuwa da nishaɗi, inda aka riƙa kunna tsofaffin waƙoƙin jaruman Kannywood da suka yi fice a zamanin su, lamarin da ya sa mahalarta taron suka yi ta rawa da walwala cikin farin ciki.
Bayan haka, an shirya liyafar cin abinci ta musamman tare da gudanar da addu’o’i domin neman albarka, zaman lafiya da kariya daga dukkan wani sharri ga sabon gidan.
Haka kuma an yi wa Hadiza Kabara fatan alheri tare da taya ta murnar kammala ginin da kuma samun damar tarewa a cikin sa.
Daga cikin manyan jaruman da suka halarci taron akwai Mansurah Isah, Hadizan Saima, Yahanasu Sani, Fati Bararoji, Aisha Yola, Fati Sulaiman, Saddiqa Jibril, Ladidi Tubless, Aina’u Ade, Raihan Imam (Ƙamshi), Rahama Sirace, da sauran su.
An dai gudanar da taron cikin kwanciyar hankali da lumana, inda kowa ya watse zuwa gidan sa cikin farin ciki da murnar wannan babban cigaba da jarumar ta samu a rayuwar ta.
