FITACCIYAR jarumar Kannywood, Momee Gombe, ta sake jawo hankalin jama’a bayan da ta gina sabon masallaci a matsayin sadaƙatul jariya ga mahaifin ta da mahaifiyar ta a kusa da gidan su da ke Gombe.
An buɗe masallacin ne a yau Alhamis cikin yanayi na farin ciki da godiya ga Allah, tare da halartar malamai, ‘yan’uwa, abokai da maƙwabta, waɗanda suka taru domin shaida wannan gagarumin aikin alheri.
A jawaban su, malamai sun yi bayani kan falalar gina masallatai da muhimmancin ayyukan sadaƙatul jariya, waɗanda lada ke ci gaba da gudana ga mamaci ko wanda ya aikata su ko da bayan rasuwar sa.
Sun yaba wa Momee Gombe bisa wannan kyakkyawan tunani na sadaukar da masallacin ga iyayen ta, tare da addu’ar Allah ya karɓi wannan aiki, ya sanya shi cikin ma’aunin kyawawan ayyukan su.
Mahalarta taron sun bayyana cewa wannan aiki abin koyi ne ga matasa da masu hali, domin yana nuna yadda za a yi amfani da ni’imar da Allah ya yi wa mutum wajen amfanar al’umma da neman yardar sa.
Bayan kammala wa’azi da addu’o’i, an gudanar da sallar jam’i ta farko a sabon masallacin, inda aka yi addu’ar Allah ya sanya shi ya kasance cibiyar ibada, ilimi da haɗin kan al’ummar yankin.
An kuma yi wa Momee Gombe addu’ar Allah ya saka mata da alheri, ya ƙara mata ɗaukaka da albarka, tare da sanya wannan aiki ya zama haske gare ta da iyayen ta a duniya da lahira.
Daga cikin fitattun ‘yan Kannywood da suka halarci bikin buɗe masallacin akwai Abdulazeez Ɗan Small, Salisu S. Fulani, Nasiru A. Ƙoƙi (Shehu Jaha) da Hamza Dogo Ɗandago.
