FIM ɗin Nijeriya mai dogon zango, ‘Kakanda’, ya sake cimma wata babbar nasara a matakin ƙasa da ƙasa bayan da aka zaɓe shi tare da ba shi takarar lambar yabo ta Gwarzon Fim (Best Film) a bikin Eurasia-Kinofest da aka kammala kwanan nan a birnin Sochi na ƙasar Rasha, da ke gaɓar tekun Black Sea.
Babban Furodusan fim ɗin, Dakta Ahmad Mohammed Sarari, shi ne ya bayyana hakan a cikin wata sanarwa da ya wallafa a shafukan sa na soshiyal midiya domin murnar wannan gagarumar nasara.
Khalid Musa ne ya rubuta labarin fim ɗin, Toka Mcbaror ya ba da umarnin shirya shi, yayin da Sarari ya shirya shi.
‘Kakanda’, wanda fim ɗin Hausa ne, shi ne kaɗai fim daga Nijeriya da ma nahiyar Afrika da aka zaɓa tare da ba shi takara a wannan rukuni, lamarin da ke nuna yadda fim ɗin ke ƙara samun karɓuwa a duniya tare da zama wani babban cigaba ga masana’antar finafinai ta Nijeriya da kuma Kannywood.
Sanarwar ta bayyana cewa bikin Eurasia-Kinofest na murnar al’adun al’ummomi ne tare da inganta gaskiyar tarihi, ɗabi’u na gargajiya da kuma kyawawan ƙimomin ruhi da ɗabi’a.
Saboda haka, zaɓen ‘Kakanda’ na nuna irin ƙimar fasaha da al’adun da fim ɗin ke ɗauke da su..
Sarari ya bayyana farin cikin sa da ɗaukacin tawagar ‘Kakanda’ kan wannan nasara, yana mai cewa samun wannan takara shaida ce ta jajircewa, sadaukarwa da ƙwazon duk waɗanda suka taka rawa wajen samar da fim ɗin.
Babban furodusan ya kuma yi ta’aziyya tare da yaba wa marigayi Nura Shariff bisa irin gudunmawar da ya bayar wajen samar da fim ɗin. Ya ce jajircewar sa, sadaukarwar sa da ƙwazon sa sun taka muhimmiyar rawa wajen nasarar da fim ɗin ya samu.
A cewar sa, abin da Nura ya bari zai ci gaba da kasancewa wani muhimmin ɓangare na wannan nasara, kuma tarihin rayuwar sa zai ci gaba da zaburar da ‘yan wasa da masu shirya fim ɗin yayin da ‘Kakanda’ yake ci gaba da samun ɗaukaka a fagen finafinai na duniya.
“Jajircewar sa, sadaukarwar sa da ƙwazon sa sun kasance wani muhimmin ɓangare na wannan nasara, kuma tarihin sa zai ci gaba da zaburar da mu,” inji Sarari.
