FITACCEN furodusan masana’antar Kannywood, Mustapha Ahmad, wanda aka fi sani da Alhaji Sheshe, ya shiga sahun ma’aurata da suka samu ƙarin igiya a bana bayan da aka ɗaura auren sa da amaryar sa, Sadiya Bashir Musa (Khairiyyah).
An ɗaura auren nasu ne da misalin ƙarfe 11:00 na safiyar ranar Asabar, 4 ga Yuli, a Masallacin Malam Musa da ke unguwar Sheshe a cikin birnin Kano.
Taron ya samu halartar fitattun jarumai da masu shirya finafinai da dama daga masana’antar Kannywood waɗanda suka haɗa da Ali Nuhu, Aminu Aliyu Momoh, Nura Mado, Nura Manaja da sauran manyan ‘yan masana’antar.
A wani ɓangare na shirye-shiryen bikin, an gudanar da wasan sada zumunta na ƙwallon ƙafa a jiya Juma’a a filin shaƙatawa na Aztec da ke Shataletalen Dangi a Titin Zariya, Kano, inda abokai da masoya suka halarta.
Alhaji Sheshe yana daga cikin fitattun furodusoshi a Kannywood, inda ya shirya finafinai masu tarin yawa da suka yi fice.
‘Yan Kannywood da dama sun taya ma’auratan murnar wannan tare, suna fatan Allah ya ba su zaman lafiya da zuri’a ɗayyiba.
