FITACCEN mawaƙi kuma Sarkin Adabin Ƙasar Hausa, Alhaji Aminu Ladan Abubakar (Ala), ya gudanar da taron Mauludin da ya saba shiryawa a duk shekara domin tunawa da murnar zagayowar watan haihuwar Manzon Allah (S.A.W.).
An gudanar da taron ne a ranar Alhamis, 27 ga Agusta, a Taskar Ala, da ke Titin Gidan Zoo a cikin birnin Kano.
Taron ya samu halartar manyan malamai, jarumai da kuma shahararrun mawaƙa, waɗanda suka gabatar da jawabai da waƙoƙin yabon Manzon Allah (S.A.W.).
Da yake jawabi kan dalilin shirya taron, Ala ya bayyana cewa taron wani muhimmin al’amari ne da suka saba gudanarwa a Taskar Ala duk shekara idan watan Mauludi ya kama.
Ya ce manufar taron ita ce ƙarfafa zumunci da haɗa kan jama’a, tare da gudanar da karatun Alƙur’ani Mai Tsarki da kuma yabon Manzon Allah (S.A.W.), domin tunawa da wannan wata mai albarka.
A cewar sa, babu wani abu da ya fi dacewa Musulmi su riƙa yi kamar yawaita ambaton Manzon Allah (S.A.W.), kasancewar sa mafi daraja cikin halittun Allah.
Ya ce: “Mu a matsayin mu na Musulmi, babu abin da ya fi ambaton Manzon Allah (S.A.W.) muhimmanci a gare mu, domin shi ne mafi daraja cikin dukkan halittun Allah.
“Saboda haka ne muke haɗuwa domin tunatar da juna game da haƙurin Manzon Allah (S.A.W.), da kyautatawar sa ga masu ƙaramin ƙarfi da kuma sauran kyawawan halayen sa, domin shi ne babban abin koyi a gare mu.
“Muna fatan wannan haɗuwa tamu za ta amfani juna wajen koyon kyawawan ɗabi’u da halayen Manzon Allah (S.A.W.).
Shi ma da yake jawabi, jarumin masana’antar Kannywood, Nura Hussaini, ya ja hankalin Musulmi kan muhimmancin riƙo da sunnar Manzon Allah (S.A.W.) da kuma yin koyi da shi a dukkan al’amurran rayuwa.
Ya yi kira ga mawaƙa da masu shirya waƙoƙin yabon Manzon Allah (S.A.W.) da su riƙa kula da irin kalaman da suke amfani da su, domin su kasance masu sauƙin fahimta ga masu sauraro.
A cewar ta sa, ya kamata masu waƙoƙin yabon Manzon Allah (S.A.W.) su guji amfani da kalaman da za su rikitar da jama’a, su kuma riƙa amfani da lafuzza masu kyau da hikima, kasancewar Manzon Allah (S.A.W.) ya gudanar da kira cikin hikima da kyawawan kalamai.
A yayin taron, Malam Hussaini Ladan Abubakar ya karanta ‘Ziyara Ga Manzon Allah (S.A.W.)’, yayin da sauran mawaƙa suka nishaɗantar da mahalarta taron da waƙoƙin yabo da ambaton kyawawan halayen Manzon Allah (S.A.W.).
Daga cikin fitattun sha’iran da suka halarci taron akwai Malam Kabiru Maulana Shalelen Waƙa, Sarkin Sha’iran Gezawa, tare da tawagar sa, da Zainab Wudil, Auwalu Lale Sayyadi, Suraj Gombe, da sauran mawaƙa.
Taron dai ya kasance wata dama ta haɗuwar masoya da mawaƙan yabon Manzon Allah (S.A.W.), inda aka yi addu’o’i da tunatarwa kan muhimmancin yin koyi da kyawawan halaye da koyarwar Annabi Muhammad (S.A.W.).
