JARUMAN Kannywood biyu, wato Ali Nuhu da Adamu Abdullahi (Daddy Hikima), da kuma mawaƙi Ali Jita sun zama jakadun wani sabon kamfanin sufuri mai suna ‘Legend’s Ryde’.
Mujallar Fim ta fahimci cewa kamfani ne mai ƙarfi a intanet da ya zo daga ƙasar Indiya tare da haɗin gwiwar Haɗaɗɗiyar Daular Larabawa (UAE) da kuma Nijeriya.
A jiya Laraba, 5 ga Oktoba, 2022 kamfanin ya ƙaddamar da ofishin sa na Kano, a yau kuma ya ƙaddamar da wani ofis ɗin a Jigawa.
Da ma sun fara ƙaddamar ofis ɗin su na Jihar Osun a ranar Asabar, 1 ga Oktoba, sai na Abuja a ranar Litinin, 3 ga Oktoba.
Ba ‘yan Kannywood kaɗai su ka naɗa a matsayin jakadun nasu ba, har tsohon ɗan ƙwallon ƙafar Nijeriya ɗin nan Kanu Nwanko da kuma wasu jaruman Nollywood.
Sanya fuskokin sanannun jarumai da mawaƙa a talla daɗaɗɗiyar dabara ce ta jan hankalin jama’a, kuma ‘yan Kannywood da dama su na cin moriyar wannan tsarin.
Sai dai mujallar Fim ba ta gano ko nawa ne aka tsadance aka biya su Ali Nuhu don su tallata wannan kamfanin ba.
Comments 2