A SAFIYAR yau Laraba ne za a gudanar da taron addu’ar mahaifin tsohuwar jarumar Kannywood, Muhibbat Abdulsalam, marigayi Malam Abdul’aziz Abdulsalam.
Mijin Muhibbat ɗin, darakta Hassan Giggs, shi ne ba da sanarwar hakan a daren jiya.
A saƙon da ya wallafa a soshiyal midiya, Malam Giggs ya ce, “In-sha Allah gobe idan Allah ya kai mu, za a yi addu’ar uku na mahaifin mata ta Muhibbat Abdulsalam. Mu na barar addu’ar ku.”
Za a yi taron addu’ar a unguwar Ɗanladi Nasidi.
Idan kun tuna, mujallar Fim ta ba ku labarin cewa Malam Abdul’aziz ya rasu a safiyar Lahadi a gidan sa da ke unguwar Ɗanladi Nasidi a Kano, bayan ya yi jinyar shekara biyu.
Marigayin, mai kimanin shekaru 92, ya rasu ya bar ‘ya’ya tara, maza shida, mata uku.
An yi masa sallah da misalin ƙarfe 10:00 na safe, sa’annan aka rufe shi maƙabartar Tarauni.
