HUKUMAR Tace Finafinai da Ɗab’i ta Jihar Kano ta dakatar da fitacciyar jarumar Kannywood kuma furodusa, Samha M. Inuwa, bisa zargin rashin ɗa’a wajen saka sutura da kuma wallafa abubuwan batsa a soshiyal midiya, tare da wasu laifuffuka makamantan haka.
A wata sanarwa da Jami’in Hulɗa da Jama’a na hukumar, Abdullahi Sani Sulaiman, ya fitar a ranar Asabar, ya bayyana cewa an dakatar da jarumar ne bayan ta yi kunnen uwar shegu da gargaɗi da dama da aka yi mata, a rubuce da na baki.
Ya ƙara da cewa baya ga dakatarwar wadda za ta ɗauki tsawon shekara guda, hukumar ta kuma soke lasisin aikin ta, tare da sanar da cewa za ta hukunta duk wani furodusa da ya fito da ita a kowane fim a tsawon wa’adin dakatarwar.
Ya ce hukumar ta ɗauki matakin ne bayan an sha gargaɗin Samha kan yadda take yin shiga marar ƙima da kuma nuna halaye marasa dacewa, amma ta ci gaba da karya ƙa’idojin hukumar, wanda hakan ya sa aka yanke shawarar dakatar da ita.
Abdullahi ya bayyana cewa dakatarwar, wadda ta fara aiki nan take, ta biyo bayan ƙorafe-ƙorafe da dama da hukumar ta karɓa daga jama’a da masu kishin Jihar Kano dangane da halayen jarumar da suka saɓa wa dokoki da ƙa’idojin hukumar.
Ya ce: “Hukumar Tace Finafinai ta Jihar Kano tana da hurumin doka na tabbatar da cewa duk bidiyo, rubuce-rubuce da sauran hanyoyin bayyana ra’ayi sun yi daidai da addini, al’adu, ƙa’idoji da darajojin jihar.
“Haka kuma hukumar ta soke izinin hulɗar ta tare da dakatar da tace duk wani fim da ta fito a ciki.
“Wannan dakatarwar wani ɓangare ne na ƙoƙarin hukumar na ci gaba da tsare kyawawan ɗabi’u a masana’antar Kannywood da kuma tabbatar da bin duk ƙa’idoji da dokokin hukumar.
“Baya ga dakatarwar, hukumar ta soke lasisin aikin ta tare da dakatar da tace duk wani fim da jarumar ta fito a ciki.
“Wannan dakatarwar na daga cikin manufofin sabon shugabancin hukumar ƙarƙashin Abba Al-Mustapha na dawo da martaba da daidaito a masana’antar shirya finafinan Hausa.”
