FITACCEN mawaƙin siyasa Dauda Adamu Abdullahi Kahutu (Rarara) ya yi wa yaran sa biyu kyautar bazata ta mota da gida.
Mawaƙin ya gwangwaje jarumi Abdullahi A. Abdullahi, wanda aka fi sani da Scorpion a Kannywood, da kyautar mota ƙirar Golf 4, yayin da kuma ya ba Rilwanu Usman (Acihalak) da kyautar gida.
Abdullahi Scorpion ya na ɗaya daga cikin dogaran Rarara, wato masu ba shi tsaro, ahi kuma Acihalak ya na ɗaya daga cikin ma’aikatan sa na ofis.
A jiya Laraba, 15 ga Satumba, 2021 Rarara ya miƙa makullin motar ga ɗan wasan da kuma takardun gidan ga hadimin sa a ofishin sa da ke Kano.
An nuna Scorpion ya duƙa ya na yi wa maigidan sa godiya a cikin wani bidiyo da mai taimaka wa Rarara a ɓangaren soshiyal midiya, Rabi’u Garba Gaya, ya ɗora a Instagram yayin da ake miƙa makullan motar ga Scorpion.
Shi ma Acihalak an nuna shi ya na karɓar takardun gidan da makullai a hannun ubangidan nasa.
A baya, ‘yan fim da dama sun samu kyautar motoci, gidaje da kuɗi a wurin mawaƙin.
Daga cikin su akwai Aminu S. Bono, Jamila Nagudu, Tijjani Asase, Abubakar Bashir Maishadda, Isah Bawa Doro, Ummi Ibro, Maryam Yahaya, da Teema Yola.
