IBRAHIM Kabir Magaji gwanin tsara hotuna ne da komfuta, abin da ake kira ‘digital painting’. Matashin, wanda Bazamfare ne, ya fara yin fice wajen zana hotunan ‘yan fim ya na wallafa su a Instagram a shafin sa na @ibeegraphics.
Shin me ya sa ya fi damuwa da ‘yan Kannywood? Ya na samun kuɗi da wannan abu da ya ke yi ko kuwa sha’awa ce kawai? Kuma me ya sa a cikin ‘yan fim duka ya fi son Rahama Sadau? Ko ya taɓa yin magana da ita kuwa?
Wannan fasihin matashin ya tattauna da mujallar Fim kwanan nan, inda ya amsa waɗannan tambayoyin da ma wasu, kamar haka:
FIM: Ka faɗa wa masu karatu tarihin rayuwar ka a taƙaice.
IBRAHIM: To, suna na dai Ibrahim Kabir Magaji. Ni haifaffen garin Zamfara ne, Ƙaramar Hukumar Gusau. Na yi karatun firamare na a Alheri Nursery and Primary School, sannan na yi sakandare na a Alheri Royal Collage, Gusau. Na wuce na yi ‘Professional Diploma’ a ‘Computer Studies’. A nan na tsaya gaskiya, ban ci gaba ba.
FIM: Ya aka yi ka fara zane?
IBRAHIM: Gaskiya na fara ganin su ‘online’, nan na koya a YouTube. To ina ganin abin kuma ya na burge ni sosai. Ni kuma sai na ga gaba ɗaya a nan Arewa ban ga mai yin irin wannan zanen ba. Sai na ce ai mu ma za mu iya, bari in gwada in gani, wataƙila zan cimma abin da na ke so. A hankali ina yi tun ina ganin abin ma ba na samo shi, har dai na fara yin ‘posting’ a Instagram, na ga mutane su na jin daɗi.
FIM: Me ya sa ka fi zana ‘yan fim?
IBRAHIM: Gaskiya abin da ya sa na fi zana ‘yan fim, ka ga su na yin hotuna masu kyau. Kuma ba ma haka ba, ina son harkar fim sosai, shi ya sa.
FIM: Akwai wata alaƙa tsakanin ka da ‘yan fim?
IBRAHIM: To, ba na dai ce ba, mu na gaisawa, amma ba wata alaƙa sosai ba. Kamar furodusa Gwammaja Entertainment, wato Yakubu furodusa kenan, shi mu na chatting da shi a WhatsApp, mu na magana sosai saboda akwai abubuwa da mu ke gabatarwa tare da shi.
FIM: Akwai ɗan fim ɗin da ka zana hoton sa, kuma ya damu har ya neme ka ya yi maka kyauta?
IBRAHIM: Gaskiya ba a taɓ ba. Amma ban dai sani ba ko nan gaba.
FIM: Mun ga wasu ‘yan fim ko su kwafa su tura a shafin su ko su yi ‘liking’ ko su ce wani abu a ƙasan zanen naka ba su yi idan ka zana hoton su. Ko wannan abin na damun ka?
IBRAHIM: Kai, ina! Bai taɓa damu na ba. Abin da na damu da shi mutane na son abin da na ke yi. Ko da na yi mutum bai yi ‘reposting’ ba ban damu ba, saboda mutane sun yaba.
FIM: Ka ɗauki zanen da ka ke sana’a? Kuma ka na samun kuɗi da shi?.
IBRAHIM: Alhamdu lillahi! Gaskiya ina samun kuɗi sosai.
FIM: Ban da ‘yan fim, akwai wasu da ka ke zanawa waɗanda ba ka ɗora su a Instagram? Misali ‘yan siyasa ko masu hannu da shuni, su kan kira ka su ba ka aiki?
IBRAHIM: Gaskiya har yanzu tukunna dai. Ka ga abin ai ba wani daɗewa ya yi ba, bai jima ba. Ina dai ƙoƙarin yaɗa sana’ar a hankali, har na cimma abin da na ke so nan gaba.
FIM: A wace shekara ka fara zane?
IBRAHIM: Na fara a shekarar 2019
FIM: Bayan zane, akwai wata sana’a da ka ke yi ne?
IBRAHIM: Gaskiya shi ne dai abin da na ke yi.
FIM: Menene burin ka a harkar zane?
IBRAHIM: Buri na ina son in zama ‘professional artist’ a nan gaba. Ba ma Nijeriya ba kaɗai, duk duniya na ke so in shiga da harkar ‘graphics’.
FIM: Ko ka na da sha’awar zama ɗan fim?
IBRAHIM: E to, nan gaba in Allah ya ce in zama ɗan fim, zan zama.
FIM: Ka na da iyali?
IBRAHIM: A’a, tukunna dai.
FIM: Shekarun ka nawa a duniya?
IBRAHIM: Gaskiya shekara na 23.
FIM: Da me ka ke yin zanen? Da hannu ne ko da komfuta?
IBRAHIM: A’a, ba da hannu ba ne. Shi wannan ana ce masa ‘digital painting’. ‘Digitally’ ake yin shi; in ka na da ‘laptop’ za ka yi, amma shi zane da za ka yi aiki sosai. Ka ga za ka yi aiki a kan idanu, a kan gashi, a kan haƙora, komai sai ka gyara su, haka kayan ma komai daban za ka yi shi.
FIM: Ka taɓa burin ka zana wani babban ɗan siyasa, kuma ka neme shi ka kai masa?
IBRAHIM: Gaskiya ina da wannan burin, sai dai yanzu yanayin ‘yan siyasan, ta ina za ka ga mutum ballantana har ka ba shi? Kwanaki akwai aikin da mu ka yi wa Rarara, har yanzu dai ba a samu an kai masa ba.
FIM: Wane ɗan fim ka ke da burin haɗuwa da shi?
IBRAHIM: Gaskiya ina da burin haɗuwa da Rahama Sadau domin ni masoyin ta ne, ta na burge ni ƙwarai da gaske.
FIM: Ka taɓa zana hoton ta?
IBRAHIM: Sosai, ina zana hoton ta.
FIM: Amma ta taɓa yi maka magana?
IBRAHIM: Ba ta taɓa magana ba, ko na yi mata ‘dm’ ba ta amsawa. Amma ban ga laifin ta ba, saboda ta na da mabiya sama da miliyan biyu a Instagram. Ka ga kuwa ta ina za ta fara? Wataƙila ma saƙo na ba za ta gan shi ba.
FIM: Ka taɓa neman lambar wayar ta?
IBRAHIM: Gaskiya ban taɓa ba, don na san zai yi min wahala.
FIM: Malam Ibrahim, mun gode.
IBRAHIM: Ina godiya ƙwarai.
