TSOHON Shugaban Ƙungiyar Ƙwararru Masu Shirya Finafinai ta Nijeriya (MOPPAN) na ƙasa, Alhaji Sani Mu’azu, ya bayyana takaici kan rashin halartar ‘yan Kannywood tarurrukan da aka gudanar na tsawon kwanaki ana koyar da harkokin kasuwanci da kuma sana’ar fim, wato Biki Da Baje-kolin Finafinan Harsunan Gadon Afrika na Kano (KILAF) duk da yake a cikin garin Kano aka yi shi kuma nan ne cibiyar harkar finafinan Hausa.
Alhaji Sani, wanda fitaccen jarumi ne a masana’antar, ya bayyana hakan ne ga mujallar Fim jim kaɗan bayan kammala taron a jiya.
A lokacin da mu ka nemi jin ra’ayin sa kan yadda taron ya gudana, sai ya ce: “To alhamdu lillah, taro dai an yi shi lafiya kuma ga shi mun zo ƙarshen sa lafiya.
“Taro ne na ƙara wa juna sani, kuma mu da aka gayyata a matsayin waɗanda za mu bada jawabi ko kuma mu ka gabatar da laccoci a wannan waje, mun yi ƙoƙari mun koyar da abubuwan da su ka shafi aktin da ‘yan wasa su ke yi.
“Kuma mun yi ƙoƙari wajen fito da ƙa’idoji ko kuma tsare-tsare na abubuwan da ya kamata mutum ya sani da ya kamata ya yi da kuma wanda bai kamata ya yi ba a matsayin sa na jarumi ko jaruma.
“Mun yi ƙoƙari mu nuna wa mutane cewa a cikin wannan aikin da mu ke yi ba wai aiki ne na wasa ko na sharholiya ba. Aiki ne da yake da ƙa’ida da dokoki. Kuma mun lissafa wa mutane irin waɗannan dokokin don su gane cewa in ka na cikin aikin ba za ka iya sakin jiki cewa ka yi yadda ka ke so ba. Lallai ne sai ka gane cewa akwai ƙa’ida a matakin abin da za ka yi, musamman a mu’amala tsakanin ka da jama’a da kuma sauran abokan aikin ka da kuma kai kan ka.
“Don haka lallai dole mutum ya san irin waɗannan dokokin don ya san irin yadda zai gudanar da sana’ar sa.”
Dangane da ƙarancin zuwan ‘yan Kannywood a taron, jagoran ya ce: “To, gaskiya abin takaici ne ka ga waɗansu sun taso tun daga Zimbabwe sun zo wannan wajen don su halarci taron, wasu sun tsallako kan iyaka daga Nijar sun shigo don su halarta, wasu sun taso daga Legas sun zo. Amma a ce kai ka na Kano kuma aikin da ka ke yi kenan, aikin da ka ke yin tutiyar shi ne, aka san ka a kai, amma ka kasa zuwa ka halarci wannan taron. Don haka gaskiya wannan abin takaici ne.”
Sani Mu’azu ya yi kira ga ‘yan fim da cewa: “Kiran da zan yi shi ne duk wanda da gaske halastaccen ɗan wannan masana’anta ne ya gane cewa ba za ka iya yi ba tare da ilimi ba, don haka in ka samu dama wadda za ka ƙara ilimi to kada ka yi wasa da ita, ka zo ka yi ƙoƙari ilimin naka ya ƙaru saboda a yadda ka ke gudanar da ayyukan ma za ka ga ka samu cigaba ka yi shi daban, ba kamar wanda ya ke yi a cikin jahilci ba.
“Domin kuwa shi wannan taron ita masana’antar za ta ci gajiyar sa da ilimi, don babu shakka an bayar da ƙasidoji daban-daban waɗanda a fannoni na ilimi da aka zo da su kuma an samu damar haɗuwa da wasu mutane na wasu wurare. Ka ga an samu damar da ayyukan mu za su kai ga wasu wurare wanda a baya ba ma tunanin za su iya kaiwa.
“Sannan za a ɗabbaka waɗannan abubuwan da mu ka yi a buga littafin wanda za a tara ilimin, wanda ‘yan baya ma za su zo su yi amfani da abubuwan da aka koyar. Don haka ya na ɗaya daga cikin abubuwan da aka samu a cikin wannan taro.”
