AMINU Ladan Abubakar (Ala) zai fitar da sabon faifan waƙoƙin sa a jibi, wato ranar Babbar Sallah.
Ala, wanda shi ne Sarkin Waƙar Sarkin Dutse, ya ɗan jima bai fitar da wata sabuwar waƙa ba.
Fitaccen mawaƙin ya faɗa wa mujallar Fim cewa zai fitar da waƙoƙin ne a matsayin kundin waƙar sa na bana, kuma ya raɗa masa suna ‘Damuwa’.
Ya ƙara da cewa, “Na yi shi ne kamar yadda na saba yin waƙoƙi na a baya, ina fitar da su ga ɗimbin masoya na domin faɗakarwa da nishaɗantarwa.”
Sunayen waƙoƙin sun haɗa da ‘Damuwa’, wadda ita ya bai wa sunan kundin, da wata mai suna ‘Ya Aka Kwana Ya Aka Tashi?’, da ‘Malam Nagurafe’, da sauran su.
A kan dalilin sa na yin album bayan kasuwar sidi da dibidi ta durƙushe, fasihin sha’irin ya ce, “Kowa ya san yadda lamarin kasuwancin finafinai da waƙoƙi ya ke a wannan lokacin, wanda a yanzu ya koma ‘online’. A nan ake tallata haja ana sayarwa kuma a ci riba. Don haka a yanzu ma ‘yan kasuwa sun daina bugawa ma.
“Amma dai saboda yanayi na al’adar taskace waƙoƙi a kundi saboda masu nazari a jami’o’i da malaman nazari, da kuma damar da na ke da ita ta tafiyar da waƙoƙi na cikin tsari na lissafi, wanda duk shekara an san na kan yi kundin waƙa ɗaya ko biyu, kuma wani lokaci idan ba a saka su a mazubi ba waƙoƙin su na ɓata, har ma ba a sanin cewar ka yi waƙar, don haka na yi wannan kundin, amma ba wai don kasuwancin ba.
“Ribar dai shi ne jama’a su san ka yi, sannan kuma a shigar da shi a cikin wata ƙa’ida ta cewa wannan shekarar ma an yi waƙar ko an yi wani kundin waƙa da ya ke ɗauke da waƙoƙi kaza a cikin sa, wanda hakan zai sa idan ana neman waƙar an san kundin da za a same ta.
“To wannan lissafin ne ya sa ni har yanzu na ke yin kundin waƙa na ce na fitar da shi, amma ba don a sayar a ce an ci riba ba. Don haka ina yi ne domin manazarta da ɗaliban jami’a, da kuma masoya na.”
Ala ya yi fatan alheri ga masoyan sa waɗanda kullum su ke yi masa fatan alheri.
