AN bayyana cewa babu kyakkyawan tsari a yadda ‘yan Kannywood su ke harkar saka finafinan su a YouTube yanzu.
Babban furodusan nan Alhaji Umar Sani Lawan Ƙofar Mazugal, wanda aka fi sani da Umar U.K., shi ne ya bayyana haka a lokacin da ya ke tattaunawa da mujallar Fim.
Umar ya ce harkar kasuwancin fim wata aba ce da ta ke karɓar duk wani cigaba da zamani ya zo da shi, to amma ya na so a yi komai a bisa tsarin da ya dace.
Furodusan, wanda ya ce babu wanda ya kai shi yawan shirya fim a masana’antar, ya ba mu labarin gwagwarmayar da ya sha kafin ya kai ƙololuwar bunƙasa a harkar shirya finafinai, ya ce: “Tun farkon shigowa ta ban ɗauki abin da wasa ba, duk da na shigo ta ne ba tare da ina da jari nawa na kai na ba, don haka sai na fara tallar sidi, da haka har na zo ina raba kaya a kasuwa, wanda kuma daga baya na zo ina turawa wasu garuruwan.
“Kuma da yake ina da wata manufa da na zo da ita ta neman cigaba, sai na yi ƙoƙarin samun yadda zan yi na fara furodusin, kuma na fara ɗin a daidai lokacin da harkar fim ɗin ta yi zafi, lokacin Malam Rabo. Na ɗauki waƙar Nazifi Asnanic ta ‘Gari Ya Yi Zafi’ na mayar da ita fim.
“Kuma alhamdullah, kusan zan iya cewa wannan fim ɗin shi ne sanadin ɗaukaka ta a harkar furodusin, saboda a yanzu zan iya cewa duk a masana’antar Kannywood babu wanda ya fi ni yawan furodusin ɗin fim.”
Dangane da canzawar da zamani ya yi, kuma ya bi zamanin, Umar ya ce: “Tun daga lokacin da kasuwancin sidi ya mutu, ni ma sai na sauya tsari don ganin an cigaba da damawa da ni. Don haka sai na tafi na yi karatu, inda na yi diploma a kan harkar fim. Kuma daga nan sai na ci gaba da faɗaɗa kasuwanci na inda na samar da wani situdiyo a cikin ginin ARTV wanda na ke gudanar da shirye-shirye da su ka shafi siyasa, addini, kasuwanci. Kuma a yanzu ina tabbatar maka da cewa a duk Kano babu wani situdiyo da ya ke gudanar da aiki kamar nawa.
“Akwai wani gidan talbijin na Ghana, Gaskiya TV, to kusan mafi yawan shirye-shirye da ake ɗaukar musu, kashi 90 cikin 100 mu ne mu ke yin aikin, saboda irin kayan aikin da mu ke da shi.”
A game da yayin da ake yi na ɗora fim a YouTube, shugaban na kamfanin UK Entertainment ya ce: “Wannan abu ne mai kyau, sai dai rashin tsari ya mayar da abin baya. Domin da su masu yin harkar za su haɗe su yi harkar a channel masu ƙarfi guda biyu ko uku, to da sai sun fi cin gajiyar abin. Amma yawan buɗewa da ake yi, kowa ya buɗe nasa, sai ya zama duk abin babu tsarin da za a ci ribar abin da yawa; idan sun fara sai su daina saboda babu kuɗin da za a gudanar da shi.
“Amma da an haɗa ƙarfi waje ɗaya, da an samu kuɗi sosai a harkar YouTube.”
Umar ya yi kira ga ‘yan Kannywood, ya ce, “Ina kira ga abokan sana’ar mu da su karɓi zamani ta hanyar tafiya da duk wani cigaba da ya zo da shi, saboda a samu a gudanar da harkar cikin tsari.”
