DUKKAN abin da aka saka wa rana komi tsawon lokacin sai ya zo. Allah cikin ikon sa, fitaccen daraktan masana’antar finafinan Hausa ta Kannywood, Sheikh Isa Alolo, shi ma ya shiga sahun masu iyali.
Yau kusan mako biyu kenan ake yaɗa hotunan kafin aure na daraktan da sahibar sa a soshiyal midiya, musamman Instagram, inda duk wanda ya ɗora hoton zai yi masu fatan alheri da fatan Allah ya kai mu lokacin.
Alhamdu lillahi! A yau Juma’a, 26 ga Fabrairu, 2021 aka ɗaura auren Alolo da santaleliyar amaryar sa, Basira Isma’il.
An ɗaura auren da misalin ƙarfe 1:15 na rana, bayan sallar Juma’a, a wani masallacin Juma’a da ke Titin Galadimawa a unguwar Hayin Ɗanmani, Kaduna, a bisa sadaki N100,000.
‘Yan fim da dama sun samu halartar ɗaurin auren. Wasu daga cikin waɗanda mujallar Fim ta gani a wajen su ne Abubakar Bashir Maishadda, Falalu Ɗorayi, Jamilu Adamu Kochila, Umar M. Shariff, Jamilu Away Man, Shamsu Ɗan’iya, Usman Mu’azu, El-Mu’az Birniwa, Ubalen Danja Kd da sauran su.
Mu na roƙon Allah ya ba su zaman lafiya da zuri’a ɗayyiba.
