ƘUNGIYAR Dattawan Kannywood ta bayyana goyon bayan ta ga shigar da ƙara kotu da babban furodusa Hamisu Lamiɗo Iyan-Tama ya yi kan wani mai sharhi a Facebook mai suna Imam Aliyu Indabawa.
Idan kun tuna, mujallar Fim ta ba ku labarin cewa Iyan-Tama ya shigar da ƙarar ne a Babban Kotun Jihar Kano sakamakon ɓatanci da zagin da Indabawan ya yi masa a cikin wani sharhi da ya rubuta a kafar ta soshiyal midiya.
Shugaban ƙungiyar dattawan masana’antar, Alhaji Mohammed Kabiru Maikaba, ya ce sun yi matuƙar farin ciki da matakin da Iyan-Tama ya ɗauka.
A sanarwar da ya fitar a yau, Maikaba ya ce: “Shugabancin majalisar ƙoli ta dattawan masana’antar shirya finafinan Hausa ta Kannywood na matuƙar farin ciki da kasancewar ɗaya daga cikin fitattun ‘ya’yan ta, Alh. Hamisu Lamiɗo Iyan-Tama, ya bijiri kai wani mutum mai yawan sharhi a shafukan dandalin sada zumunta na Facebook ƙara a kotu saboda yawan cin zarafin ‘ya’yan masana’antar Kannywood da ya ke yawan yi.
“Majalisar ta nuna farin ciki da kuma nuna goyon baya ga wannan gagarumin mataki da ɗan nata ya ɗauka.”
Ya ƙara da cewa majalisar ta nuna gamsuwa ga matakin kuma a shirye ta ke da ba wa Iyan-Tama duk wani goyon baya da gudunmawar da ya ke buƙata.
Maikaba ya ce majalisar ta yanke shawarar bayyana goyon bayan ne a wani taron shuwagabannin ta, inda ta taya Iyan-Tama addu’ar samun nasara a wannan shari’a.
Idan kun tuna, ita ma Haɗaɗɗiyar Ƙungiyar Mashirya Fim ta Nijeriya (MOPPAN) ta bayyana irin wannan goyon bayan ga Iyan-Tama.
