A YAU Asabar, 11 ga Nuwamba, 2023 aka ɗaura auren ɗiyar babbar furodusa a Kannywood kuma tsohuwar shugabar Ƙungiyar Masu Shirya Finafinai ta Nijeriya (MOPPAN), reshen Jihar Kaduna, Hajiya Fatima Ibrahim Ahmad (Lamaj), wato Fa’iza Abubakar Gamagira, da angon ta ASN Ibrahim Aliyu Bello.
An ɗaura auren da misalin ƙarfe 11:00 na safe a gidan Alhaji Sa’idu Gamagira, mai lamba, 104, Salmanduna, Birnin Zariya, Kaduna, a kan sadaki N100,000.
Wakilin mujallar Fim ya ruwaito cewa taron ɗaurin auren ya samu halartar mutane da dama, na nesa da na kusa.
A jiya Juma’a, 10 ga Nuwamba, an gudanar da gagarumin bikin ‘Kamu’ a ɗakin taro da ke cikin makarantar sakandare mai suna Zabeb da ke ‘Yan Majalisu, unguwar Dosa, Kaduna.
Yau Asabar kuma, bayan ɗaurin aure, an yi yinin biki a Radio Close, daura da NAF Club, Rabah Road, Kaduna. Amarya da iyayen ta, ƙawaye da ‘yan’uwa da abokan arziki su cashe da kiɗan asharalle daga mawaƙi Idi Waziri.
An tashi daga taron da misalin ƙarfe 6:00 na yamma, aka kuma fara shirye-shiryen kai amarya ɗakin mijin ta.
Hajiya Fatima Lamaj ta nuna farin cikin ta kan yadda aka fara biki lafiya, aka ƙare lafiya. Ta kuma yi godiya ga dukkan waɗanda su ka halarta, tare da fatan kowa ya koma gidan sa lafiya.
Allah ya ba su zaman lafiya da zuri’a ɗayyiba.
