FITACCEN mawaƙi Aliyu Mukhtar (‘Ali Show’) ya ƙara samun ƙaruwar ‘ya mace, inda a ranar Talata, 1 ga Oktoba, 2019 matar sa Maryam ta haifi santaleliyar yarinya.
Da sati ya zagayo, wato Talata, 8 ga Oktoba, aka raɗa wa yarinya suna Maryam, amma za a riƙa kiran ta da Walida.
An yi shagalin bikin sunan ne a gidan mawaƙin da ke Shola Quarters bayan asibitin Babban Asibitin Gwamnatin Tarayya na Katsina.
Dandazon ‘yan fim da mawaƙan Jihar Katsina da na Kano ne su ka yi jerin gwano a wurin bikin sunan, inda su ka riƙa hawan sababbin waƙoƙin taya murnar haihuwa ga mawaƙin.
A cikin su har da fitaccen mawaƙin bege ɗin nan na garin Kano mai suna Habu Tabule, wanda yake suman bogi idan ya na wasa a majalisi.
Wasu mawaƙan Kanon da su ka samu halarci hidimar sun haɗa da Naja’atu Ta Annabi, Shamsu Alale, Naser Hotoro da Mahmud MG.
Akwai kuma mawaƙan Katsina irin su Aliyu Nata, Abu Amshi, Salisu Arabi, Musty Opera, Haruna Zango, Isah Randawa, Sadik A.U.F., Ali Kwaya, Mustapha Mai Taraliya, Abu Malina, DG Shareef da Naziru Mai Kwashewa.
Ali Show dai ya na ɗaya daga cikin matasan mawaƙa a Katsina da ya daɗe ya na jan zaren ɗaukakar sa ba tare da ya tsinke ba.
Yanzu haka ya na da ‘ya’ya biyu, mace da namiji.
Allah Ya raya su baki ɗaya, amin.
