MAWAƘIN nan wanda ya ɓata mata ‘yan fim a wata waƙa, Malam Sarfilu Umar Zarewa (Sufin Zamani), ya bayyana nadamar abin da ya yi tare da ba su haƙuri, kwana ɗaya bayan ya samu beli daga Hukumar Tsaron Ƙasa (DSS).
Idan kun tuna, mujallar Fim ta ba ku labarin yadda hukumar ta tsare shi daga shekaranjiya zuwa jiya sakamakon ƙarar sa da Haɗaɗɗiyar Ƙungiyar Masu Shirya Finafinai ta Nijeriya (MOPPAN) ta kai mata.
A daren yau Sufin Zamani ya saki bidiyon da ya yi inda ya ba ɗaukacin ‘yan fim haƙuri kan waƙar tozarcin da ya yi wa mata ‘yan fim, waɗanda ya ce wai ba su son zaman aure.
Kakakin MOPPAN, Malam Al-Amin Ciroma, ya ce bayar da haƙurin da Sufin Zamani ya yi ya na daga cikin sharuɗɗan da DSS ta gindaya masa.
A bidiyon, mawaƙin ya ce, “Yau aƙalla shekara goma sha huɗu kenan da fara sana’a ta ta waƙa, sannan aƙalla na yi waƙa ta kai guda ɗari da saba’in da huɗu.
“Cikin ikon Allah, duk waƙoƙin da na ke yi ban taɓa yin wata waƙa da na zagi wani ko na ci zarafin wani ko na baƙanta wa wani ba. Kullum buri na shi ne na faranta wa mutane, ba na baƙanta wa mutane ba, shi ya sa waƙoƙi na gaba ɗaya ma ɓangaren barkwanci ne.
“To amma an samu akasi a wannan lokaci, ‘yan kwana kwanan bayan nan sai ga shi na yi wata waƙa wacce gaba ɗaya ba ta yi wa ɗaukacin ilahirin ‘yan masana’antar finafinan Hausa daɗi ba.
“To, zan yi amfani da wannan dama in roƙi afuwar ku, don Allah don Annabi ku yafe min.
“Jaruman masana’antar Kannywood, mazan ku da matan ku, an shaide ku da kun yi shura wajen ƙaunar ku ga Annabi Muhammadu. To, ku yi haƙuri don Annabi Muhammadu. Na san Bahaushe ya ce ‘matar na tuba ba ta rasa miji’, to ina da tabbacin shi ma ‘mijin na tuba’ ba zai rasa mata ba.
“Kamar yadda na yi waccan waƙa ba ta yi maku daɗi ba, in-sha Allahu zan yi wata kuma wacce za ta faranta maku, za tai maku daɗi.”
Daga nan sai ya rera baiti biyu na waƙa kamar haka:
“‘Yan wasan Hausa mun shaida ku na riƙe aure,Mata da mazan ku mun gane ku na riƙe auren sunna.
‘Yan wasan Hausa mun gane ku na riƙe aure,Mata da mazan ku ba kwa wasa fa da auren sunna.”
Sufin Zamani dai ya samu beli ne a jiya Alhamis, 23 ga Yuni, 2023 bisa waɗannan sharuɗɗan:
1. Zai yi bidiyo da odiyo na ban-haƙuri da kuma ƙaryata kan sa game da waƙar ɓatancin da ya yi.
2. Zai yi waƙa kishiyar wacce ya yi, wato ya yabi matan Kannywood, ya faɗi alherin su kuma ya nuna masu zaman aure ne.
3. Zai rubuta wa MOPPAN takardar ban-haƙuri.
4. Zai yi wa hukumar alƙawari a rubuce, wato ‘undertaking’, cewar ba zai ƙara yin ɓatanci ga duk wani ɗan fim ba.
5. Bayan ya yi wannan kuma hukumar DSS za ta yi masa hukuncin da ya dace, domin ya yi musu ƙarya a farkon kamun da aka yi masa.
MOPPAN ta ce yarjejeniyar ta biyo bayan amincewar da ya yi cewa ya aikata laifin.
