GAMAYYAR ƙungiyoyin masu shirya finafinan Hausa sun bi sahun al’ummar Nijeriya wajen taya Mai Martaba Sarkin Kano, Alhaji Aminu Ado Bayero, alhini bisa rasuwar mahaifiyar sa, wato Mai Babban Ɗaki, Hajiya Maryam Ado Bayero.
Marigayiyar, wadda matar tsohon Sarkin Kano Ado Bayero ce kuma uwa ga Sarkin Bichi Nasiru Ado Bayero, ta rasu ne a wani asibiti a ƙasar Masar a ranar Asabar, 24 ga Afrilu, 2021.
‘Yar shekara 80 a duniya, an yi jana’izar ta a ranar Litinin, 26 ga Afrilu a Ƙofar Kudu, wato gidan Mai Martaba Sarki.
A yayin da ɗimbin jama’a daga sassa daban-daban ke ci gaba da zuwa ta’aziyya ga Mai Martaba Sarki, su ma ‘yan fim ba a bar su a baya ba.
A yau Alhamis, 29 ga Afrilu, wasu daga cikin jagororin ƙungiyoyin Kannywood sun kai wa Sarki ziyarar ta’aziyya a madadin sauran ‘yan fim bisa wannan babban rashi da aka yi.
Waɗanda su ka jagoranci ziyarar sun haɗa da shugaban riƙo na MOPPAN da shugaban Gidauniyar Kannywood (wato Kannywood Foundation) da kuma wasu daga Zauren Dattawan Kannywood (wato Kannywood Elders Forum).
Da ya ke jawabi, shugaban Zauren Dattawan Kannywood, Malam Auwalu Isma’il Marshal, ya bayyana mutuwar Mai Babban Daki a matsayin babban rashi da aka yi wa Jihar Kano baki ɗaya, ba wai ga Mai Martaba Sarki kaɗai ba.
Marshal ya ce, “Ita Mai Babban Ɗaki uwa ce gaba ɗaya a gare mu. Saboda haka mun zo mu yi ta’aziyya da kuma jajantawa, da fatan Allah ya yi mata rahama. Shi kuma Mai Martaba Sarki Allah ya ba shi haƙurin jure wannan rashi.”
Shi ma a nasa jawabin, shugaban MOPPAN reshen Jihar Kano, Salisu Muhammad (Officer) ya ce, “Wannan ta’aziyya da ma ya kamata a ce tun da fari mun gayyato mutanen mu mu zo a yi ta, saboda irin dangantaka mai ƙarfin gaske da ta ke a tsakanin wannan masana’anta da kuma masarautar Kano tun kafin ya zama Sarkin Kano.
“Ba wanda mu ke alfahari da shi a cikin wannan masana’anta kamar shi. Kamar yadda mu na gayyatar sa abubuwan mu ya zo, mu ma kuma ya na gayyatar mu. Don haka wannan rashi ne ga dukkannin masana’antar shirya finafinai ta Hausa.
“Mutumin mu ne, kuma ya ba mu gudunmawa mai yawa a cikin wannan sana’a tamu.”
A lokacin ziyarar ta’aziyyar, mujallar Fim ta ga manyan ‘yan fim da su ka haɗa da Auwalu Marshal, Shu’aibu Yawale, Salisu Officer, Kabiru Maikaba, Hamisu Lamiɗo Iyan-Tama, Ɗan’azumi Baba (Kamaye), Bashir Bala Ciroki, Bala Anas Babinlata, Mustapha Musty da Nura Mado.
Mu ma a mujallar Fim mu na addu’ar Allah ya yi mata rahama, ya ba iyalan masarautar ikon jure wannan babban rashi.
