SHUGABA Bola Ahmed Tinubu ya naɗa jarumi a Kannywood, Ali Nuhu, muƙamin Manajan Daraktan Hukumar Finafinai ta Nijeriya (Nigerian Film Corporation, NFC).
Naɗin na Ali Nuhu ya na cikin wata sanar da mai magana da yawun shugaban na Nijeriya, Ajuri Ngelale, ya fitar yau Juma’a, 12 ga Janairu, 2023.
Mujallar Fim ta ruwaito cewa Ali Nuhu ya na cikin jerin mutane 11 da shugaban Nijeriya ya naɗa shugaban hukumomin da ke ƙarƙashin Ma’aikatar Fasaha Da Al’adu.
Haka kuma Shugaba Tinubu ya naɗa tsohon editan adabi na jaridar The Guardian, wato Dakta Shaibu Husseini, a matsayin Darakta-Janar na Hukumar Tace Finafinai ta Ƙasa (NFVCB).
A sanarwar da gwamnatin ta bayar, Shugaban Ƙasa ya umurci waɗanda aka naɗa a ƙarƙashin ma’aikatar da su yi aiki tuƙuru cikin ƙwarewa, sadaukarwa da ƙaunar ƙasa domin ƙarfafa wannan sashe na ƙirƙira da kyautata al’adu.
A masana’antar Kannywood, murna ta karaɗe ko’ina, duk inda ka leƙa a soshiyal midiya, hotunan Ali Nuhu ke yawo, ana taya shi murna.
Allah ya taya shi riƙo, amin.
