WATA ƙungiya da ke garin Funtuwa a Jihar Katsina mai suna Hausawa Development Association for Peace and Unity ta kai ƙorafi ga Hukumar Tace Finafinai ta Jihar Kano kan shirin ‘Labarina’ zango na 15, tana zargin cewa shirin yana zubar da mutuncin al’ummar Hausawa.
Ƙorafin yana ƙunshe ne cikin wata wasiƙa da lauyan ƙungiyar, Abubakar Abdulsalam, na ofishin A.A. Zangon Marke & Co. Karaduwa Law Chambers, GRA, Funtua, ya aike wa Hukumar Tace Finafinai ta Jihar Kano a ranar 30 ga Yuni, 2026.
Wasiƙar mai taken “Matsaya da Ƙorafi a Kan Shirin Labarina Season 15 Tare da Sanarwa Kafin Shigar da Ƙara” ta bayyana cewa lauyoyin suna wakiltar ƙungiyar ne bisa zargin shirin yana nuno Hausawa a matsayin marasa addini, masu aikata manyan laifuka, kuma marasa tarbiyya.
Ƙungiyar ta buƙaci hukumar da ta sake nazarin shirin tare da umurtar masu shirya shi da su cire ko su gyara sassan da take ganin sun saɓa wa ƙa’idojin tantance finafinai.
Haka kuma, ta bai wa hukumar wa’adin makonni biyu da ta ɗauki matakin da ya dace, tana mai gargaɗin cewa idan ba a yi hakan ba za ta bi hanyoyin shari’a domin neman mafita.
A ƙoƙarin jin ta bakin mai shirya shirin, Malam Aminu Saira, Mujallar Fim ta yi ƙoƙarin tuntuɓar sa ta waya amma ba a samu nasarar yin magana da shi ba.
Sai dai ɗaya daga cikin na kusa da shi, Ahmad Nagudu, ya shaida wa Mujallar Fim cewa ya ga kwafen wasiƙar bayan an turo masa ta manhajar WhatsApp, kuma ya nuna wa Saira ɗin.
A cewar sa, Saira bai karɓi kwafen wasiƙar kai tsaye ba, kuma ba su da tabbacin ko an kai masa gida ne ba a same shi ba, kasancewar a halin yanzu yana cikin gudanar da ayyukan sa.
Nagudu ya ƙara da cewa tun da ta hannun lauyoyi aka aika da wasiƙar, kamfanin Saira Movies ma yana da nasa lauyoyin da za su bi lamarin ta hanyar doka idan buƙatar hakan ta taso.
