ƘUNGIYAR nan ta siyasar ‘yan fim mai suna Tripple R Kannywood for Renewed Hope ta yi alƙawarin ɗaukar nauyin biyan kuɗin aikin da za a yi wa ƙanwar jarumar Kannywood, Hajiya Fati Al-Amin, wadda ke kwance a Asibitin Koyarwa na Malam Aminu Kano (AKTH) sakamakon cutar sankarar mama da take fama da ita.
Alƙawarin ya biyo bayan ziyarar jaje da shugabannin ƙungiyar, ƙarƙashin jagorancin Dauda Kahutu Rarara, suka kai wa mara lafiyar a jiya Alhamis, 2 ga Yuli.
A yayin ziyarar, ƙungiyar ta bayyana cewa za ta biya kuɗin aikin da likitoci suka tsara za a yi wa mara lafiyar, wanda aka ƙiyasta ya kai kusan naira miliyan 3.4. An ce za a gudanar da aikin ne da zarar likitoci sun ayyana ranar da za a yi shi.
Baya ga ɗaukar nauyin aikin, Rarara da maiɗakin sa, Aisha Humaira, sun kuma bayar da gudunmawar naira 500,000 domin tallafa wa kula da mara lafiyar kafin lokacin aikin.
Da take bayyana jin daɗin ta, Fati Al-Amin ta gode wa ƙungiyar bisa wannan tallafi, tare da yin addu’ar Allah ya saka musu da alheri, ya kuma ci gaba da ba su ikon gudanar da irin waɗannan ayyukan taimako.
Rarara ya ce tallafa wa marasa lafiya na daga cikin manyan manufofin Tripple R Kannywood for Renewed Hope, yana mai tabbatar da cewa ƙungiyar za ta ci gaba da kai ɗauki ga masu buƙatar taimako a sassa daban-daban na al’umma.
