CIKIN alhini da jimami ne aka samu labarin rasuwar tsohuwar jarumar Kannywood, Hajiya Jamila Gwarzo, wadda ta shahara musamman da rawar da ta taka a matsayin matar Ɗantani Mai Shayi a cikin fitaccen shirin talbijin na ‘Daɗin Kowa’ da tashar Arewa 24 ke gabatarwa.
Marigayiyar ta kasance daga cikin tsofaffin jaruman da suka daɗe suna ba da gudunmawa a harkar fim da wasan kwaikwayo, inda ta yi fice tun a harkar dirama.
Tun kafin shigar ta harkar finafiinai, Jamila ta daɗe tana wasan dirama a ƙungiyar Tauraruwa, Kano, waɗanda suka shahara wajen gudanar da wasan kwaikwayo a Majalisar Matasa da ke Fagge.
Rahotanni sun nuna cewa jarumar ta rasu ne a garin Gwarzo da ke Jihar Kano, bayan ta yi fama da ciwon ciki.
Marigayiyar, wadda aka ƙiyasta shekarun ta kimanin 37, ta kasance jaruma mai hazaƙa da baiwa wajen taka rawar da ake ba ta.
A ‘Daɗin Kowa’, ta nuna ƙwarewa da basira wajen gudanar da rawar da aka ba ta.
Abokan sana’ar ta sun bayyana Jamila a matsayin mace mai mutunci, ladabi da sauƙin kai. Haka kuma, ana yaba mata da haƙuri, riƙon amana da yadda take girmama mutane, babba da ƙarami.
Rasuwar ta ta bar babban giɓi a zukatan iyalan ta, abokan sana’ar ta da masoyan finafinai.
