DA yawa al’ummar ƙasar nan su na fargabar sake shiga dokar kulle irin wadda aka sha ta tsawon watanni a baya saboda annobar korona, ciki har da mawaƙin Hausa Ali Isa Jita.
Shahararren mawaƙin ya bi sahun ‘yan Nijeriya a soshiyal midiya ya na roƙon a jinkirta saka dokar kullen saboda ba ya son mayar wa mutane kuɗin su na waƙa da ya riga ya karɓa.
Ali Jita ya ce, “A bari sai watan Maris kafin a saka dokar kulle. Rayuwar mawaƙa na da muhimmanci. Ba zan iya mayar wa da mutane kuɗin su ba, na gama shiri da kashe kuɗin,” inji shi cikin wani saƙo da ya wallafa a Twitter.
Ya ƙara da cewa da ma tuni mawaƙa su ka shiga matsin rayuwa tun daga farkon wannan shekara.
Dubban ‘yan Nijeriya ma na ta bayyana ra’ayoyin su game da dokar kullen, wadda Gwamnatin Tarayya ta sake ɓullo da wasu a jiya Litinin bayan ƙaruwar masu kamuwa da cutar ta korona.
