Kamar yadda ‘yan fim suka saba shirya taron bikin ranar haihuwar su lokaci zuwa lokaci. Ita ma
JARUMA, furodusa kuma mawaƙiya a Kannywood, Raihan Imam Ahmad (Ƙamshi) ta shirya taron bikin zagayowar ranar da aka haife ta.
Taron, wanda aka gudanar da a ranar Asabar, 29 ga Yuni, 2024, an yi shi ne a wani ɗakin taro dake Titin Ahmadu Bello da ke unguwar Nassarawa G R A a cikin garin Kano.
Taron dai na kece raini ne, domin an daɗe a cikin ‘yan fim ba a shirya kamar sa ba;
Kusan duk wata jaruma da ke ji da kan ta ta halarta.
Mawaƙa da dama sun baje kolin su inda aka shafe tsawon lokaci ana kaɗe-kaɗe da raye-raye.
Sai kuma daga baya aka shirya liyafar cin abinci, wanda shi ma kan sa abincin an yi masa shiri na musamman, don haka abinci ne na alfarma kuma a wadace. Sannan daga baya Raihan Imam Ahmad Ƙamshi ta zo ta yanka kek ɗin ta tare da rakiyar ƙawayen ta.
A taƙaitaccen bayanin da ta yi a wajen, Raihan ta yi godiya ga Allah da ya nuna mata ranar haihuwar ta cikin ƙoshin lafiya, sannan ta yi godiya ga ‘yan’uwa da ƙawaye waɗanda dukkan masoyan ta da su ka halarci wajen taron bikin nata. Kuma ta yi wa kowa fatan alheri tare da addu’ar Allah ya kai kowa gidan sa lafiya.
