FITACCEN mai kwalliyar nan a Kannywood, Mansur Isma’il, wanda aka fi sani da Mansur Makeup, ya na ɗaya daga cikin ‘yan fim waɗanda su ka shigo shekarar 2022 da ƙafar dama, domin kuwa zai yi aure a ranar Asabar mai zuwa, 8 ga wannan watan na Janairu, 2022.
Kamar yadda mujallar Fim ta gani a katin gayyatar bikin, za a ɗaura auren sa da Amina Murtala Kwacciɗo (Mummy), a Masallacin Rahamaniyya da ke Sabon Fegi, Gusau, Jihar Zamfara da misalin ƙarfe 1:00 na rana.
Tun a cikin watan jiya Mansur ya fara ɗora hotuna da bidiyon kafin aure da su ka yi da sahibar sa a Instagram. Hakan ya sa abokan sana’ar sa su ka riƙa taya shi murna tare da yaɗa hotunan a shafukan su.
Haka kuma Mansur ya ɗora hotunan ankon da za a saka a wajen bikin.
Wannan shi ne auren Mansur Makeup na farko.
