FITACCEN jarumi kuma mawaƙi Adam A. Zango ya shi sahun ‘yan fim masu bada kyautar mota, inda ya fara tasa kyautar ga aminin sa, jarumi Jamilu Adamu Kochila.
Zango, wanda darakta ne kuma furodusa, shi ne mamallakin Prince Zango Production da White House Family, a Kaduna.
Kochila ya samu kyautar motar ne a ranar Asabar, 5 ga Mayu, 2022, inda Zango ya gwangwaje shi da Honda Anaconder baƙa.
Ya yi murna sosai da wannan kyauta da ya samu, kuma abokan sana’ar sa sun taya shi murna tare da yi wa Zango addu’ar samun ƙarin buɗi.
Bayan wannan, sai kuma Zango ya gwangwaje ɗaya daga cikin hadiman sa, wato Saifullahi Safzor, da dalleliyar mota ƙirar Marsandi mai kalar toka.
Jarumin ya yi wa Safzor kyautar ne a ranar Alhamis, 14 ga Afrilu, 2022. Shi Safzor ɗin ya nuna farin cikin sa da samun gagarumar kyauta daga ubangidan sa.
Abokan sana’ar waɗannan mutane biyu sun yi ta yaɗa hotunan motocin wanda aka haɗa hoton Zango duk a jikin hoton.
Waɗannan kyaututtuka sun nuna irin riƙon amanar da waɗannan bayin Allah su ka yi wa Zango, domin da dama daga cikin waɗanda jarumin ke ja a jika sun guje shi daga baya. Su kuwa har yanzu su na tare da shi kai da fata.
Hasali ma a yanzu duk inda Zango ya saka ƙafa, za ka ga Kochila a wurin.
Allah ya sa alheri.
