WATA Kotun Majistare da ke Magajin Gari, Kaduna, a yau Juma’a ta mayar da shari’ar nan da ake gwabzawa tsakanin jarumar Kannywood Hadiza Aliyu Gabon da wani mutum zuwa Babbar Kotun Shari’ar Musulunci.
Idan kun tuna, mujallar Fim ta ba ku labarin yadda wani ma’aikacin gwamnati mai suna Bala Musa ya yi ƙarar Hadiza a kan zargin wai ta yi masa zamba cikin aminci, ta ci kuɗin sa amma ta ƙi auren sa.
An yi zaman kotun har kusan sau huɗu ana ɗagawa, amma da aka koma kotu a yau sai alƙalin, Malam Isiyaku Abdulrahman, ya bayyana mayar da shari’ar zuwa Babbar Kotun Musulunci da ke Tudun Wada.
Hakan ya biyo bayan ƙorafin da lauyan mai ƙarar, Barista Nurudeen Murtala, ya yi.
Kamfanin Dillancin Labarai na Nijeriya (NAN) ya ruwaito cewa a yayin da ya ke bayyana mayar da shari’ar zuwa wata kotun, alƙalin ya zargi lauyan da ƙoƙarin ɓata wa kotun lokaci.
Ya ce: ”Ka na da zaɓi biyu. Na ɗaya ko dai in yi watsi da ƙarar ko in mayar da ita ga wata kotun.”
Shi dai Bala Musa, ya kai Hadiza Gabon kotu ne saboda ta ƙi auren sa bayan ya wahala da ɗawainiya.
Ya faɗa wa kotun cewa: “Zuwa yanzu na kashe N396,000 a kan ta. A duk lokacin da ta buƙaci kuɗi, haka na ke ba ta ba tare da wani ɓata lokaci ba tare da fatan za mu auri juna mu.”
Ita kuwa jarumar, tun tuni ta ƙaryata zargin ta hannun lauyan ta, Barista Mubarak Sani.
A cewar ta, ita ba ta ma taɓa ganin ko haɗuwa da Musa ba, kuma babu wata alaƙa ko kaɗan a tsakanin su.
Lauyan mai ƙarar ya gabatar da takardar lissafin kuɗin banki ga kotun kuma ya faɗa wa kotun cewa akwai wasu mutum huɗu da ya ba kuɗi a bisa iƙirarin sun kai wa wadda ake ƙarar.
Biyu daga cikin huɗun, wato Fatima Abdullahi ta ce ita ƙawar Gabon ce, shi kuma Abdullahi Yusuf, ya ce shi yaron ta ne.
Sun amsa laifin su na yin sojan gona da sunan Hadiza Gabon har su ka karɓi kuɗi da sunan ta, amma sun roƙi kotun da ta yafe masu.
Bayan an fito daga kotun, lauyan wadda ake ƙara ya faɗa wa manema labarai cewa ya so kotun ta wanke Hadiza daga tuhumar tare da sallamar ta domin ba ta cuci kowa ko ta yi wa wani zamba cikin aminci ba, kamar yadda ake zargin ta.
Shi kuwa lauyan mai ƙara, cewa ya yi shi abin da ya ke so kawai shi ne a yi wa kowa adalci.
