Da Sunan Allah Shi ɗaya,
Zan fara bayani bai ɗaya.
Rabbu Kai tilo ne Kai ɗaya,
Ba kama a gare Ka gaba ɗaya.
Duk halittun ƙas da samaniya,
Kai ne Ka yiwo su gaba ɗaya.
Rabbana saita mini zuciya,
Nai bayani ba wata zamiya.
Nai salati na yo tahiya,
Ga abin ƙaunar mu gaba ɗaya.
Al-Bashiru aminin duniya,
Ka ji mai ceton mu gaba ɗaya.
Ni nufi na zan yi matashiya,
Ga shababu su bar sharholiya.
Wataƙila a yo mini tambaya,
Kan batun me za ka matashiya?
Kan batun ƙwallon Birtaniya,
Wofin banza na Pirimiya.
Ko batun ƙwallo na Sipaniya,
La Liga abin hauragiya.
Ga Juventus can ta Italiya,
Waɗansu kan ta su ke ta hayaniya.
Masu son ta su ce mata gimbiya,
Ba karatu sai dai tankiya.
Wasu har azumi fa su ke niyya,
Don sadaukarwa ga Sipaniya,
Ko su yo yankar ƙurbaniyya,
Zallar ƙaunar Barceloniya.
David Beckham tuni ya riya,
Ba ya son ummah Islamiyya.
Haka ma Chelsean Birtaniya,
Ba su son jinsin Ifrikiyya.
Ga su Manchester Britaniya,
Team ne biyu ‘yan gabar tsiya.
Masu son su a nan Najeriya,
Ba su son juna gabar tsiya.
In su na musun Manchestiya
Ka ga mamakin hauragiya.
Huruwar hanci da ta jijiya,
Ga bankaura da hayaniya.
Sun mance nasihar gaskiya,
Sunnar Manzo Bahanifyya.
Duk Musulmi kaf baki ɗaya,
‘Yan’uwan juna ne bai ɗaya.
Ya shababu ku zo duka bai ɗaya,
Ga nasiha kukan kurciya.
Kui riƙo da tafarkin gaskiya,
Garkuwa kenan ga hayaniya.
Duk samarin wannan nahiya,
Mui ta himma ba hauragiya.
Na tuno gargaɗi na mazan jiya,
Zungur su Sa’adu abin biya.
“Mu dai ilimi mu ka tambaya,
Ko a London ko a Arebiya”.
Ya shababu ku lura da duniya,
Mai bugarwa ce tamfar giya.
Lokacin da mutum ya ji lafiya,
Ba ya komai sai ɓarnar tsiya.
Balle kuma in ya ga dukiya,
Ta taru irin zinariya.
Sai ka gan shi ya na ta fahariya,
Ga hululu da yin sharholiya.
Sai ya rinƙa zuwa Birtaniya,
Old Trafford can a Sitadiya.
Wani ko ya nufanci Italiya,
Inter Milan ‘yan hauragiya.
Ko ya zo shi ya ƙirƙiri ƙungiya,
Shi ya ke yanke mata cibiya.
Yai ta kan renon ta da dukiya,
Har ta kai wata ‘yar hamshaƙiya.
Maimakon ya yi zakkar dukiya,
Ko ya yo sadaka mai jariya.
Amma sai dai ya yi tutiya,
Wai ya na da zaratan ƙungiya.
Ya Allah kai mana kariya,
Daga bin sha’awowin zuciya
Kar mu faɗa ruɗun duniya,
Mui ta bankaura da hayaniya.
Tabbatar mana tsarkin zuciya,
Mui ta addini bisa gaskiya.
Nai salati na yo tahiya,
Ga Aminu Rasulun gaskiya.
Nai yabo kuma na yi ta godiya,
Ga Alimu Ilahun gaskiya.
Farfesa Salisu Shehu malami ne a Jami’ar Bayero, Kano
