MAWAƘI Aminu Ladan Abubakar (Ala) ya bayyana cewa ya shiga siyasa ne domin ya sauya akalar yadda ake tafiyar da harkar siyasa da tsarin ta a yau.
A tattaunawar sa da mujallar Fim, Ala ya ce: “Babu shakka, na shahara a waƙa ta fadakarwa da ilmintarwa da waƙoƙin sarakuna, da kuma wani siyasar da a yanzu na shige ta duka.
“Da man can ina yin siyasa, amma a wani lungu, don siyasa ta na da lunguna da yawa. To, a cikin lungunan da ta ke da shi akwai waƙa, don haka mu na lungun tallar ɗan takara a tsakanin sa da jama’a. Kuma a yanzu sai aka wayi gari aka gan ni na fito takarar Majalisar Tarayya mai wakiltar Ƙaramar Hukumar Nassarawa a Jihar Kano.”
Da mu ka tambaye shi ko wannan wani ƙudiri ne da ya ke da shi tun a baya ko sai a yanzu ne abin ya zo masa, sai ya amsa da cewa: “To, wannan ya zo ne daga baya, amma hakan bai zo mini da mamaki ba, tunda yanayi ne da ya zama mutane su na kiwon ka, kuma da man shi taken dimokiraɗiyya shi ne mulki daga mutane, su ne za su nuna nasu kuma sai a yi mulkin domin su.
“To mutane sun sun fito da ni a matsayin wanda su ke ganin sa a matsayin sananne kuma zai iya ba da gudunmawar sa saboda nagartar sa da su ke ganin idan su ka tsayar da shi ba za su ji kanya ba.
“Ko waƙoƙin da na ke yi, za ka ga sadaukarwa ne, ba na samun kuɗi ba. Don haka ne ma jama’a su ka neme ni a wannan fage na takara. Don haka ni ina ganin saboda an zaɓe ni, rayuwa ta da halaye na ba za su sauya ba daga inda aka san ni.
“Don haka za mu yaƙi irin wasu matsaloli da su ka dabaibaye harkar siyasa ne don mu kawo sauƙi. Don haka ba za mu zo mu yi wa mutane ƙarya kawai don su so mu ba.
“Don haka su mutane su san ma’anar wakili da aikin sa. To, ko iya wannan na yi na tsaya na wayar da kan mutane a kan haka zan iya cewa na ci riba. Don haka yunƙurin da na yi na fitowa takara shi ma na ci riba da shi, saboda a yanzu matasa iri na sun yarda cewa kowa ma zai iya.
“Don haka aikin da ya ke gaban mu shi ne mu wayar da kan matasa a kan siyasar ‘yanci da kuma wayewa.”
Ɗan takarar ya yi kira ga matasa cewa su san kan su domin su ma su na da ‘yanci, bai kamata ya zama ana amfani da su ta wata hanya da ba ta dace ba, saboda buƙatun wasu na siyasa.
