Bayan kammala tantancewar da alkalan gasar rubutu ta tunawa da Marigayi Alhaji Bashir Othman Tofa suka yi a jiya Asabar, hukumar Kano Book Club da The Third Space suka bayyana zakarun gasar gajerun labaran Hausa da aka gudanar.
A yayin taron dai shugaban alƙalan gasar, Malam Isma’il Bala, ya bayyana labarin “Ilimi Kogi” na Hamza Sadiq Adam a matsayi na 1, yayin da labarin “Kazar Amarci” na Muntasir Shehu ya zama na 2, sai kuma “Yaro Masomin Babba” na Hassana Abdullahi Hunkuyi ya zo na 3.
Ga dai jerin labaran daga na ɗaya zuwa na 3, da takardar shaidar karramawa da kuma kudin da za a ba su.
- “Ilimi Kogi” na Hamza Sadiq Adam na 1, N150,000.
- “Kazar Amarci” na Muntasir Shehu na 2, N100,000.
- “Yaro Masomin Babba” na Hassana Abdullahi Hunkuyi na 3, N50,000
Sauran labaran da suka tsallake mataki na ƙarshe sun haɗa da:
- “Ribar Adabi” na Rufa’i Abubakar Adam.
- “Wutar Kara” na Lantana Ja’afar
- “Budurwar Zuciya” na Usman Ibrahim Ali.
- “Tsaka Mai Wuya” – Madina Bala Hussaini.
Sai dai ba a bayyana wanne labari ne na 4 zuwa na 7 ba, an dai karrama su ne kawai a wajen bayyana zakarun gasar.
Tun da farko, an fara gudanar da bita ga marubutan da suka samu nasara da misalin ƙarfe 11 na safe a kan rubutu da salo da sauran sigogin rubuce-rubucen ƙagaggun labarai, kafin daga bisani da misalin ƙarfe 2 na rana aka gabatar da taron karrama marubutan.
Bayan kyaututtukan littattafan marigayi Bashir Othman Tofa da aka bai wa zakarun gasar, an karɓi lambar asusun banki na marubuta ukun farko domin a tura musu goron gasar.
Taron ya samu halartar babban hadimin marigayi Bashir Othman Tofa wanda ya wakilci iyalan sa, wato Alhaji Unguwar Gini, da Farfesa Abdalla Uba Adamu da alƙalan gasar da sauran marubutan Hausa da na Turanci.
