FITACCEN mawaƙin siyasar nan ko kuma a ce mawaƙin Shugaban Ƙasa Muhammadu Bahari, Alhaji Ibrahim Saleh (Yala), shi ma ya shiga sahun ‘yan Kannywood da su ka yi aure a wannan makon.
Kamar dai yadda aka saba, hotunan kafin aure na mawaƙin da kyakkyawar amaryar sa sun yi ta yawo a soshiyal midiya, inda abokan sana’ar sa su ka yi ta yi masu fatan alheri.
A jiya Asabar, 27 ga Fabrairu, 2021 aka ɗaura auren Yala da santaleliyar amaryar sa Halima Muhammad Kauru (Sima) da misalin ƙarfe 1:30 na rana, a Masallacin Sarkin Musulmi Bello da ke Unguwar Sarki, Kaduna.
An ɗaura auren a kan sadaki N100,000.
Manyan ‘yan siyasa da ‘yan fim sun halarci ɗaurin auren. Wasu daga cikin su sun haɗa da Mataimakin Gwamnan Jihar Katsina Mannir Yakubu, Sanata Uba Sani, Honarabul Sama’ila Sulaiman, Shugaban Ƙaramar Hukumar Kaduna ta Arewa Saleh Shu’aibu, Shugaban Ƙaramar Hukumar Kaduna ta Kudu Kabiru Jarumi, Sani Sha’aban (Ɗanburan Zazzau), Falalu Ɗorayi, Abdul Amart, Sadiq Mafiya, Ahmad Yariman Tiga, Sagir Baban Kausar da sauran su.
Kafin a ranar ɗaurin auren, ranar Alhamis, 25 ga Fabrairu, an yi bikin Ranar Ƙauyawa (Ƙauye Day). An kuma yi wankan amaryar, wato ‘bridal shower’, a ranar Juma’a, 26 ga Fabarairu.
Yau Lahadi, 28 ga Fabrairu ita ce ranar buɗar kai, inda mahaifiyar ango ta shirya walima a gidan angon da ke unguwar Hayin Banki, Kaduna.
Allah ya ba su zaman lafiya da zuri’a ɗayyiba, amin.
