SHAHARARREN mai zane, Kamal Y. Iyan-Tama, ya ba ‘ya’yan ƙungiyar Muryar Mawaƙa Mata A Yau shawara da su samu tsohon shugaban Ƙungiyar Masu Shirya Finafinai ta Arewa (AFMAN), Alhaji Hamisu Lamiɗo Iyan-Tama, don neman shawawari da ci-gaban ƙungiyar su.
Kamal, wanda ke yawan zana hotunan ‘yan fim, ya ba da shawarar ne a Facebook bayan mujallar Fim ta fitar da hirar da ta yi da mawaƙiya Fati Kawo.
Sarkin Yaƙin Iyan-Tama ya ce, “Haƙiƙa daga farko har zuwa ƙarshe na karanta dukkan abin da Fati Kawo ta bayyana abin bai yi min daɗi ba gaskiya. A ce a matsayin ku na mata, ‘ciwon ‘ya mace ai na ‘ya mace ne’.”
Ya ci gaba da cewa, “Ya kamata a ce haɗin kan da za a gani a wurin ku, sai dai maza su kwaikwaya. Wato harka in dai ta kuɗi ce gaskiya ta na da wuyar sha’ani, ba wai a wurin ku mata ba, a’a, har maza ma, balle kuma batu na ƙungiya.
“Tun da na fara ganin wannan yunƙuri ta wurin yaya ta Maryam A. Baba na yi farin ciki da jin wannan abin alheri. Duk da ina namiji, a matsayi na na mai son ganin rauni ko ciwon da ke damun ku ya warke, ina ganin shawara ta cikin ladabi, ku tashi ku taka zuwa wurin matashin dattijo a masana’antar Kannywood, wato Alh. Hamisu Lamiɗo Iyan-Tama, ku gabatar da abin da za ku yi, ku nemi shawarwarin sa, a ƙarshe ku ce ku na so ya zama uban ƙungiyar ku, sannan ya zama tsani ko jagoran ku.
“Haka dukkan wani lamari da ya shafi tsarin Tafiyar da kasafin kuɗi, wallahi ba ni shakkar sa, domin wannan bawan Allah mutum ne.
“In-sha Allah kwalliyar ku za ta biya kuɗaɗen sabululluka, saboda mutum ne da ya goge a fannoni da dama na harkar kasuwanci da kasafin kuɗi tare da kowace irin tafiya ta shugabancin ƙungiya da ƙungiyoyi.”
