UWARGIDAN tsohon Shugaban Ƙasa, Hajiya A’isha Buhari, ta miƙa saƙon ta’aziyyar ta ga ‘yan’uwa da abokan aikin marigayiya Hajiya Saratu Giɗaɗo (Daso).
Hajiya A’isha ta tura saƙon ta’aziyyar ta ƙarƙashin gidauniyar ta mai suna ‘Future Assured’.
Marubuciya Fauziyya D. Sulaiman ce wadda ta fitar da saƙon ta’aziyyar inda ta ambato A’isha Buhari ta na faɗin: “A madadin tawagar ‘Future Assured’, ina miƙa ta’aziyyar mu ga iyalan ƙawar mu da ta rasu, Hajiya Saratu Giɗaɗo (Daso).
“Allah ya yi mata rahama na har abada, ya sauƙaƙa mata kwanciyar kabari, ya bai wa iyalai da masoyan ta ƙarfin imani a cikin wannan yanayi na baƙin cikin rashin ta.
“Hajiya Saratu Giɗaɗo Musulma ce mai kishin ƙasa wacce ta yi rayuwar ta, kuma ta yi wa jama’a hidima ta hanyar fasaha da nishaɗantarwa mai tsari da tasiri da babu bambanci.”
Mujallar Fim ta ruwaito cewa Daso ta na ɗaya daga cikin mutanen da ke amfana da gidauniyar ‘Future Assured’, domin a cikin watan azumin nan an tura mata buhunan shinkafa ta raba wa bayin Allah, kuma da ma duk shekara haka ake masu.
